Şirvan şəhəri ərazisində koronavirus pandemiyası əleyhinə profilaktik tədbirlər davam etdirilir.

  Koronavirus infeksiyasının yayılmasının və törədə biləcəyi fəsadların qarşısının alınması məqsədilə şəhər ərazisində zəruri və qabaqlayıcı profilaktik tədbirlərin həyata keçirilməsi davam etdirilir.
   Azərbaycan Respublikası Nazirlər Kabinetinin qərarı ilə aprel ayının 20-dən etibarən ölkə ərazisində xüsusi karantin rejiminin müddətinin uzadılmasına müvafiq olaraq şəhər ərazisində hərəkət məhdudiyyətinin tətbiqi davam etdirilib, xüsusi karantin rejiminin tələblərinin yerinə yetirilməsi məqsədi ilə yaradılmış 23 mobil qrup üzvləri ilə birlikdə şəhər Polis Şöbəsinin əməkdaşları və Daxili Qoşunların N saylı hərbi hissəsinin əsgər və zabit heyəti tərəfindən xüsusi karantin rejiminin tələblərinə nəzarət işləri gücləndirilib.
   Əhalinin sağlamlığının qorunması məqsədi ilə gün ərzində şəhərin küçə və prospektləri Fövqəladə Hallar Nazirliyinin xüsusi texnikalarının köməyi ilə dezinfeksiyaedici maddələrlə yuyulub, Gigiyena və Epidemiologiya Mərkəzinin və şəhər Bələdiyyəsinin sanitar işçiləri tərəfindən yaşayış binalarının ətrafında, giriş bloklarında, pilləkən qəfəslərində, ticarət və xidmət obyektlərində, sərnişindaşıma xidməti göstərən nəqliyyat vasitələrində, ödəniş terminallarında, park və xiyabanlarda, avtomobil dayanacaqlarında, qəsəbələr də daxil olmaqla ümumilikdə 180-dən çox obyektdə dezinfeksiyaedici maddələrlə təmizlik işləri aparılıb. Məcburi köçkünlər üçün salınmış yaşayış kompleksində binalarının girişlərində, pilləkən qəfəslərində, ərazidə yerləşən sosial obyektlərdə təkrar dezinfeksiya işləri həyata keçirilib.
   Şəhər İcra Hakimiyyətinin başçısı İlqar Abbasov və şəhər Polis Şöbəsinin rəisi Hikmət Quliyev şəhərə giriş-çıxışın məhdudlaşdırılması məqsədi ilə yaradılmış postlarda vəziyyətlə yenidən maraqlanmış, Gigiyena və Epidemiologiya Mərkəzi və şəhər Bələdiyyəsi tərəfindən şəhər ərazisində aparılan profilaktik dezinfeksiya işləri ilə yerində tanış olaraq əlavə dezinfeksiya işlərinin görülməsi ilə bağlı lazımi tövsiyyə və tapşırıqlarını veriblər.