İndi nə status-kvo var, nə də təmas xətti

Çox İllərdən bəri  torpaq, Vətən həsrətli  insanların qəlbini ağrıdan, ağrı-acıya son qoyan, Azərbaycan xalqına  yenidən tarixi  müstəqilliyin sevincini yaşadan Prezident, Ali Baş Komandan İlham Əliyev  dövlətçilik, diplomatik fəaliyyətində qazandığı uğurlar fonunda  təcrübəli dövlət xadimi, uzaqgörən siyasətçi olduğunu da təsdiqlədi.  Ermənistanın işğalı altındakı torpaqlarımız azad olunduqca  Azərbaycanın əsrlərdən bəri  tarixin izlərini   daş sinəsində yaşadan qalalar,  abidələr qəribsədiyi doğmalarına qovuşur. Dövlət başçısı, Ali Baş Komandan kimi  Azərbaycan xalqına  müdrikcəsinə  başçılıq edən, yol göstərən cənab İlham Əliyev  ulu öndər Heydər Əliyevin xilaskarlıq missiyasını da ləyaqətlə yerinə yetirir.
  Son günlərdə  dünyanın tanınmış KİV-lərinin jurnalistlərinin ölkəmizə davamlı səfərlərinin məqsədi  dövlətçilik təcrübəsi, siyasi iradəsi,  təşəbbüsləri ilə dünya siyasətində  yeni cığır açan dönməz, qətiyyətli, sağlam düşüncəsi ilə   beynəlxalq ictimaiyyətin  diqqətini Azərbaycana yönəldən, xalqına xidməti həyat amalına çevirən   Prezident İlham Əliyevlə, onun dövlətçilik təcrübəsi, xalqına, torpağına bağlılığı ilə tanış olmaqdır. Prezident,   Milli Ordumuza  sərkərdə kimi başçılıq edən  Ali Baş Komandan  İlham Əliyev  illərdən bəri dünyanın siyasi arenasında aktuallığı ilə seçilən,   ikili standartların qurbanı olan həqiqətləri məntiqli, düşünülmüş  açıqlamaları ilə cavablandıraraq əsl reallığa aydınlıq gətirir.  Məkrli siyasəti ilə  beynəlxalq ictimaiyyəti  aldadan, özünü  məzlum, əzilmiş xalq simasında təqdim edən Ermənistanın  vəhşiliyini,  faşizmə sadiqliyini, tarixin dili, hadisələrin mürəkkəbliyi ilə açıqlayır.Özünü qalib dövlətin başçıları kimi təsəvvür edən Ermənistanın keçmiş və indiki  rəhbərlərinin Prezident İlham Əliyevin məntiqli arqumentləri qarşısında  susmaları ədalətin yalan üzərində qələbəsidir.  Daşnak ideologiyasının təzahürü olan qəddarlığı, qana hərisliyi , etnik təmizləmə prinsiplərini, faşizm mahiyyətini  terrorçuluqla birləşdirən  Ermənistanın  vandalizmi  bu toplumun alnına yazılan alçaqlıq, rəzillikdir. Korrupsioner dövlət kimi tanınan, xarici ölkələrdən göstərilən yardımlar, havadarlarının ianələri hesabına özünü müstəqil dövlət hesab edən Ermənistanın rəhbərləri, indiki baş naziri Nikol Paşinyan belə öz xalqını aldadaraq, mif  xəstəliyini genefondlarında yaşadır və saxta  təfəkkürləri ilə inkişaf etdirirlər. 
  Cəsur Azərbaycan əsgərlərinin hücumlarına tab gətirməyərək hərbi avadanlıqlarını, silah-sursatlarını döyüş meydanında qoyub qaçan, canlı qüvvə sarıdan xeyli itki verən işğalçı dövlətin rəhbərləri məğlubiyyətini etiraf etmək əvəzinə hələ də «qalib Ermənistan»  xəyalı ilə  yaşayırlar.  Havadarlarına, beynəlxalq təşkilatlara yalvararaq imdad diləyir, atəşkəs  istəyirlər. 1994-cü ildən bəri bağlanan atəşkəsə bir gün belə əməl etməyən Ermənistanın artıq bu  istəyinin mənası belə yoxdur. İllərdən bəri  Xocalı soyqırımını tanımayan,  erməni cəlladları tərəfindən qətlə yetirilən  günahsız azərbaycanlıların tökülən qanlarına biganə qalan beynəlxalq ictimaiyyət ermənilərin Gəncə terrorundan sonra danışmaq haqları yoxdur.  Humanitar atəşkəs rejimində belə    döyüş bölgəsindən çox uzaqlarda yerləşən Azərbaycan torpaqlarını  ballistik raketlərlə atəşə tutan,  mülki əhalini qətlə yetirən Ermənistanın  ağ bayraq qaldırmaqdan başqa  çarəsi qalmır.
Xarici ölkə jurnalistlərinə müsahibələrində də Azərbaycanın bir qarış torpağının işğal altında qalmasına yol verilməyəcəyini, status-kvonun, təmas xəttinin  Azərbaycanın Milli Ordusunun  rəşadətli döyüşləri sayəsində ləğv olunduğunu diqqətə çatdıran   Prezident İlham Əliyev Ali Baş  Komandan kimi Azərbaycan xalqının  torpaqlarımızın bütövlüyü, haqq-ədalət  uğrunda apardığı  Vətən müharibəsini  milli birlik, həmrəylik adlandırır. Bu  mübarizədə qardaş Türkiyənin, Pakistanın, ölkəmizin haqq işinə dəstək olan dövlətlərin həmrəyliyini  yüksək qiymətləndirir.  Yaponiyanın  «Nikkei» qəzetinə müsahibəsində Ermənistan və Azərbaycan arasında olan münaqişənin həll yolunu tapmaq üçün mandatı olan Minsk qrupunun  nəticə verməyən  fəaliyyəti ilə bağlı  fikrini  “Əlbəttə ki, indi yerdə vəziyyət dəyişmişdir. Satus-kvo artıq mövcud deyil. Təmas xətti də mövcud deyil. Buna görə, əlbəttə, mən hesab edirəm ki, indi Ermənistan rəhbərliyi daha da məntiqli davranmalıdır və işğal edilmiş ərazilərin boşaldılmasına sadiq olmalıdır” söyləyən Prezident İlham Əliyev bildirir ki, “Ermənistanın bu hökuməti ilə münaqişənin sülh yolu ilə  nizamlanması perspektivləri çox uzaqdır. Çünki Ermənistan rəhbərliyi tərəfindən verilmiş çox səmərəsiz və təhrikedici bəyanatlar, edilmiş hərəkətlər, əslində, danışıqları mənasız etmişdir” sözləri ilə bildirən, BMT Təhlükəsizlik Şurasının qətnamələrinə müvafiq olaraq Azərbaycanın işğal olunmuş ərazilərinin boşaldılmasını xatırladan cənab İlham Əliyev onu da diqqətə çatdırdı ki,  Ermənistanın baş naziri “Qarabağ Ermənistandır” bəyan edəndə,  Azərbaycanın qondarma “Dağlıq Qarabağ hökuməti” ilə danışıqlar aparmalı olduğunu deyəndə, dinc Gəncə şəhərinə ballistik raket zərbəsi vurmaq əmri verəndə və Azərbaycanın digər şəhərlərinə gündəlik olaraq hücum edəndə  məğlub olacağı məqamı da unutmamalı idi. Hətta  humanitar atəşkəsə əməl etməyən Ermənistanın başıboş baş naziri bilməli idi ki,  qüdrətli Azərbaycan Ordusu qarşısında  onun sınıq-salxaq ordusu tab gətirə bilməz. Siyasi savadı, dövlətçilik təcrübəsi olmayan Paşinyan o dərəcədə savadsızdır ki, hələ də anlamır ki, birtərəfli atəşkəs olmur. Elə buna görə də Azərbaycan Ordusunun  torpaqlarımızın bütövlüyü uğrunda  apardığı müharibədə  məğlub olmağa məhkumdur. “Ona görə  Ermənistan hökuməti öz davranışı haqqında ciddi düşünməlidir və əgər  atəşkəsin səmərəli olmasını istəyirsə, birincisi, atəşkəsi pozmamaq, ikincisi, artıq  işğaldan azad edilmiş  əraziləri geri  götürməyə cəhd etməmək və işğal olunmuş Azərbaycan  ərazilərinin boşaldılması  üçün üzərinə ciddi  öhdəlik  götürməlidir”  söyləyən Prezident İlham Əliyev onu da bildirir ki, Paşinyanın  qondarma “Dağlıq Qarabağ hökuməti»ni” danışıqlara, üçüncü dövlətləri müharibəyə cəlb etmək səyi, sərsəmləməsi xəyaldır.
   Müharibənin sülh yolu ilə  bitməsinin  tələbi də, şərt də dəyişilməzdir:  Müharibənin sülh yolu ilə həlli üçün Ermənistan  işğal etdiyi  torpaqları qeyd-şərtsiz, son qarışına qədər  Azərbaycana qaytarmalıdır.
   Azərbaycanda heç zaman ikinci erməni dövlətinin yaranmasına imkan verilməyəcəyini bildirən Prezident İlham Əliyev  Dağlıq Qarabağda  heç vaxt referendumun keçirilməyəcəyini  qətiyyətlə bildirir:  “Öz müqəddəratını  təyinetməyə gəldikdə, ermənilər artıq öz müqəddəratlarını təyin ediblər. Onların  müstəqil Ermənistan dövləti var. Təsəvvür edin, əgər ermənilər yaşadıqları hər yerdə  öz müqəddəratlarını təyin etsələr nə baş verər, dünyada  neçə kiçik Ermənistan olar”.
   Amma  Ali Baş Komandan İlham Əliyevin qətiyyəti  sayəsində torpaqlarımızı  işğaldan azad edən Azərbaycan Ordusu status-kvonu, təmas xəttini ləğv etdiyi kimi, Ermənistanın istinad etdiyi “xalqların milli müqəddəratını təyinetmə” prinsiplərinin üstündən  həmişəlik xətt çəkdi. Tarixi həqiqəti qanları ilə yazan şəhidlərimizin, Milli Ordumuzun  qalibiyyət şüarı olan “Qarabağ bizimdir, Qarabağ Azərbaycandır!” sözləri erməni mifini dağıtmaqla, Vətənin müqəddəsliyini, bölünməzliyini dünyaya bəyan etdi.

İltifat Nəbiyev,
Şirvan Şəhər Mərkəzləşdirilmiş Kitabxana Sisteminin direktoru