Azərbaycan Respublikasının Prezidenti cənab İlham Əliyevin doğum günüdür

Bu gün Azərbaycan Respublikasının Prezidenti, Silahlı Qüvvələrin Qalib Ali Baş Komandanı cənab İlham Əliyevin doğum günüdür.
      Ölkə başçısı yeni yaşını Müzəffər Ali Baş Komandan kimi qarşılayır.
    Bildiyimiz kimi, bu ilin sentyabrın 27-dən noyabrın 10-dək düşmən təxribatlarına qarşı şanlı ordumuz Ali Baş Komandan İlham Əliyevin rəhbərliyi ilə işğal altında olan torpaqlarımızın azad edilməsi uğrunda “Dəmir yumruq” əməliyyatını həyata keçirib. İlham Əliyevin məqsədyönlü siyasətinin məntiqi yekunu olaraq, 44 gün sürən hərbi əməliyyatlar nəticəsində müzəffər Azərbaycan ordusu Cəbrayıl, Füzuli, Zəngilan, Qubadlı şəhərlərini, Azərbaycan xalqının tarixində, mədəniyyətində və qəlbində xüsusi yeri olan, Qarabağın tacı sayılan Şuşa şəhərini, ümumilikdə, 300-dən çox yaşayış məntəqəsini, həmçinin, mühüm strateji yüksəklikləri işğaldan azad edib. Hər bir azərbaycanlı sevinir və fəxr edir ki, 30 ildən sonra işğaldan azad edilmiş torpaqlarımızda indi üçrəngli bayrağımız dalğalanır.
    Cənab Prezident İlham Əliyevin ölkənin birinci xanımı hörmətli Mehriban xanım Əliyeva ilə birlikdə işğaldan azad olunmuş torpaqlarımıza səfərləri zamanı milli-mənəvi dəyərlərimizə, tarixi abidələrimizə, dağıdılmış şəhər və rayonlarımızın bərpasına göstərdikləri diqqət hər birimizdə Azərbaycanımızın gələcəyinin etibarlı əllərdə olmasına inamı gücləndirir.
    Biz də Azərbaycan Respublikasının Prezidenti, Müzəffər Ali Baş Komandan cənab İlham Əliyevi doğum günü münasibətilə ürəkdən təbrik edir, Ona uzun ömür, cansağlığı, Azərbaycanımızın daha da inkişaf etməsi və çiçəklənməsi yolundakı fəaliyyətində uğurlar arzulayırıq!