2 fevral-Azərbaycan Gəncləri Günü münasibətilə Şirvan Şəhər İcra Hakimiyyətinin başçısı İlqar Abbasovun təbriki
01 fevral 2023 | 18:58
Əziz gənclər!
Sizi Azərbaycan Gəncləri Günü münasibəti ilə səmimi qəlbdən təbrik edirəm. Sizə sağlam həyat və uğurlu gələcək arzulayıram.
Əsası Ulu öndər Heydər Əliyev tərəfindən qoyulan gənclər siyasətinin nəticəsi olaraq, bu gün Azərbaycan gəncləri ölkənin ictimai-siyasi, iqtisadi və mədəni həyatında fəal qüvvəyə çevrilib, dövlətə, dövlətçiliyə sədaqətli, milli-mənəvi dəyərlərə bağlı, intellektual səviyyəli, geniş dünyagörüşlü şəxsiyyət kimi formalaşmaqdadır.
Ölkəmizdə Gənclər Evlərinin, Olimpiya İdman Komplekslərinin, idman-sağlamlıq mərkəzlərinin yaradılması, gənclər siyasətinin həyata keçirilməsi sahəsində qanunvericilik bazasının möhkəmləndirilməsi və gənclərin sosial problemlərinin həlli istiqamətində əldə olunan nailiyyətlər dövlət başçısı cənab İlham Əliyev, Birinci vitse-prezident, hörmətli Mehriban xanım Əliyeva tərəfindən sizlərə göstərilən böyük diqqət və qayğının bariz nümunəsidir.
Bu gün Azərbaycan gəncləri elm, mədəniyyət, səhiyyə, sənaye, idman, diplomatiya sahəsində əldə etdikləri uğurlarla ölkəmizin adını yüksəklərə qaldırırlar. Müasir Azərbaycan gəncliyinə baxanda, müstəqilliyimizin, dövlətçiliyimizin, ərazi bütövlüyümüzün əmin əllərdə olmasından qürur hissi keçirirəm.
Respublikamızın müstəqilliyini, təhlükəsizliyini, ərazi bütövlüyünü təmin etmək kimi müqəddəs vəzifəni yerinə yetirən vətəndaşlarımızın böyük əksəriyyəti də gənclərdir. Müzəffər Ali Baş Komandanın rəhbərliyi ilə torpaqlarımızın işğaldan azad olunması uğrunda 44 günlük Vətən müharibəsindən qələbə ilə çıxan Azərbaycan gənclərinin öz vətənpərvərlikləri ilə şanlı tarix yazmaları hər birimizin yaddaşında əbədi qalacaqdır. Ömrünün ən gözəl çağında şəhid olan gənclərimizə Allahdan rəhmət, qazilərimizə şəfa diləyirəm!
Bu cür milli ruha, sağlam əqidəyə, intellektual dünyagörüşə malik gənclərimiz dövlətimizin sabahına daha inamla baxmağa əsas verir.
Əziz gənclər, Vətənimiz Azərbaycan adına bir çox qürurverici uğurlara imza atmanız diləyilə bir daha Sizi Gənclər günü münasibətilə təbrik edir, ən xoş arzularımı çatdırıram.
Bayramınız mübarək olsun!
Hörmətlə,
İlqar Abbasov
Keçidlər
