Şəhid Həsən Həsənovun yeni doğulan övladı xəstəxanadan çıxarılıb.
Vətən müharibəsinin Şirvan şəhərindən olan cəsur döyüşçüsü, torpaqlarımızın azadlığı uğrunda gedən döyüşlərdə qəhrəmancasına şəhid olan Həsən Həsənovun 12 mart 2021-ci il tarixində ikinci oğul övladı dünyaya gəlib. Həm şəhidimizin şərəflə daşıdığı adını əbədiləşdirmək, həm də arzusunu həyata keçirmək məqsədilə körpəyə Həsəncamal adı verilib.
Martın 15-də doğum evindən yola salınan şəhidimizin ailəsini xəstəxana önündə "YAŞAT" Fondunun, Şirvan Şəhər İcra Hakimiyyətinin, Gənclər üçün Təhsil Mərkəzi Aran Regional ofisinin əməkdaşları, döyüş yoldaşları, yaxınları qarşılayıblar.
Mərasimdə öncə çıxış edən “YAŞAT” Fondunun əməkdaşı bildirib ki, şəhidimizin yeni doğulan övladının zəruri xərcləri Fond tərəfindən qarşılanıb. Bu məqsədlə 1000 AZN anaya təqdim olunub və dünyaya yeni göz açan körpənin adına 5000 AZN-lik hesab açılıb. Həmin məbləğin üzərinə mütəmadi olaraq faiz toplanılacaq və şəhidin övladı 16 yaşına çatdıqdan sonra toplanan məbləği özü hesabından çıxara biləcək.
Şirvan Şəhər İcra Hakimiyyətinin başçısı İlqar Abbasovun salamlarını və xoş arzularını şəhidin ailə üzvlərinə çatdıran Şirvan Şəhər İcra Hakimiyyəti İctimai-siyasi və humanitar məsələlər şöbəsinin baş məsləhətçisi Samirə İsmayılova qeyd edib ki, torpaqlarımızın azadlığı və Vətənimizin bütövlüyü uğrunda şəhid olanlar ən yüksək ehtirama layiqdir. Vətən müharibəsində şəhid olanların övladları bizə onların əmanətidir. Dövlət başçısı cənab İlham Əliyev və Birinci vitse-prezident çox hörmətli Mehriban xanım Əliyeva tərəfindən şəhid ailələrinə göstərilən diqqət və qayğı Şirvan Şəhər İcra Hakimiyyəti tərəfindən davam etdirilir. Şəhidlərimiz daim ehtiramla yad edilir, onların ailələrinə mütəmadi baş çəkilir, mövcud problemlərinin aradan qaldırılması üçün mütəmadi olaraq tədbirlər həyata keçirilir. Bütün şəhid övladları kimi yeni doğulan körpə qəhrəmanımız da daim qayğı ilə əhatə ediləcəkdir. Balaca Həsəncamalın müstəqil, azad, bütöv Azərbaycanda xoşbəxt və firavan böyüməsi üçün dövlət səviyyəsində bütün tədbirlər görülcəkdir.
Şəhid Həsən Həsənovun döyüş yoldaşları çıxış edərək, Həsənin qanının yerdə qalmadığını, onun və bütün şəhidlərimizin qisasının alındığını, Şanlı Qələbədə onların payı olduğunu vurğulayıblar. Həsənlə qürur duyduqlarını, onun hər iki oğlunun atalarının adına layiq olmasını, mərd, cəsur böyümələrini arzulayıblar.
Şəhid Həsən Həsənovun anası Məryam Həsənova və həyat yoldaşı Qəriyyə Həsənova onlara göstərilən diqqət və qayğıya görə dövlət başçısı cənab İlham Əliyevaya və Birinci vitse-prezident çox hörmətli Mehriban xanım Əliyevaya dərin minnətdarlıqlarını bildiriblər.
Sonra şəhidin övladına və xanımına hədiyyələr təqdim olunub.
Qeyd edək ki, Həsən Rəhim oğlu Həsənov 1990-cı ilin oktyabr ayının 1-də Şirvan şəhərində anadan olub. 2008-ci ildə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Şirvan Şəhər Şöbəsi tərəfindən Azərbaycan Silahlı Qüvvələrinə həqiqi hərbi xidmətə çağırılıb, 2010-cu ildə hərbi xidmətdən tərxis olunub. 2017-ci ildən Azərbaycan Silahlı Qüvvələrinin N saylı hərbi hissəsində müddətdən artıq həqiqi hərbi xidmət hərbi qulluqçusu (MAHHXHQ) kimi xidmət etməyə başlayıb. 2020-ci ilin sentyabrın 27-də başlanan II Qarabağ müharibəsində Hadrut, Füzuli rayonu istiqamətində torpaqlarımızın azadlığı uğrunda gedən döyüşlərdə əsl qəhrəmanlıq nümayiş etdirib. Vətənini ən şirin nemət olan canından çox sevən Həsən Həsənov 3 oktyabr 2020-ci il tarixində böyük bir izdihamla Şirvan şəhər Şəhidlər Xiyabanında dəfn edilib. Azərbaycan Ordusunun çavuşu, Şirvan şəhərinin Vətən müharibəsində ikinci şəhidi Həsən Rəhim oğlu Həsənov ölümündən sonra Azərbaycan Respublikasının Prezidenti cənab İlham Əliyevin 15 dekabr 2020-ci il tarixli Sərəncamına əsasən "Vətən uğrunda”, 25 dekabr 2020-ci il tarixli Sərəncamına əsasən “Füzulinin azad olunmasına görə” medalları ilə təltif edilib.
Mətbuat xidməti
