Şirvan Şəhər İcra Hakimiyyətinin başçısı İlqar Abbasovun Pasxa bayramı münasibətilə şəhərin pravoslav xristian icmasına təbriki

Hörmətli həmvətənlər!

Müqəddəs Pasxa bayramı münasibətilə şəhərimizin bütün xristian əhalisini səmimi qəlbdən təbrik edir, hər birinizə möhkəm cansağlığı və xoşbəxtlik arzulayıram.
   Əsrlər boyu Azərbaycanda, o cümlədən şəhərimizdə müxtəlif xalqların və dinlərin nümayəndələri qarşılıqlı etimad, dostluq və mehribanlıq  şəraitində yaşayaraq, insanlar arasında humanizm və həmrəylik prinsiplərinin, cəmiyyətimizdə tolerantlığın, eləcə də  birgəyaşayış nümunəsinin ən yüksək səviyyəyə çatdırılmasında fəal iştirak etmişlər.
   Möhtərəm Prezidentimiz cənab İlham Əliyevin rəhbərliyi ilə dinlərarası və mədəniyyətlərarası dialoq mərkəzi kimi tanınan Azərbaycanda milli azlıqların dil və mədəniyyətlərinin inkişafı, etnik-mədəni müxtəlifliyinin, tarixi-mənəvi irsinin qorunub saxlanması dövlətimizin xüsusi diqqət və qayğı ilə yanaşdığı prioritet məsələlərdəndir.
   Dövlət başçısının həyata keçirdiyi bu siyasət  Şirvan şəhərində də layiqincə davam etdirilir.Tolerant və multikultural ənənələrə malik Şirvan şəhərində pravoslav xristian icması öz dini etiqad və inanclarını, adət-ənənələrini, bayram və mərasimlərini azad və sərbəst şəkildə icra edirlər. Hər il şəhərimizdə ənənəvi keçirilən Pasxa bayramı xeyirxahlığın, mərhəmət və şəfqət duyğularının ifadəsinə çevrilib.
   Qarşılıqlı hörmət və ehtiramın nümunəsi olaraq,  ölkəmizdə yaşayan başqa millətlərin və dinlərin nümayəndələri, o cümlədən xristian həmvətənlərimiz həm Birinci Qarabağ müharibəsində, həm də 2020-ci ilin sentyabrın 27-də başlanan İkinci Qarabağ müharibəsində torpaqlarımızın işğaldan azad edilməsi uğrunda döyüşmüş, şücaət və qəhrəmanlıq nümunələri göstərmişlər. Bu əziz gündə onları da xüsusi ehtiramla yad edirik.
Əziz dostlar!
   Pasxa bayramı bu il ölkəmizdə koronavirus infeksiyasının geniş yayılmasının qarşısının alınması məqsədilə elan olunan xüsusi karantin rejimi qaydalarına uyğun keçiriləcəkdir. Özünüzü və yaxınlarınızı qorumaq və tezliklə virusa qalib gəlmək üçün qaydalara əməl etməyinizi tövsiyə edirəm.
   Sizə bir daha xoş bayram ovqatı, ailələrinizə sevinc, rifah, süfrələrinizə bol ruzi-bərəkət arzulayıram.
   Bayramınız mübarək olsun!
                        
                       Hörmətlə                             

                                                                                                                           İlqar Abbasov