Şirvan şəhərində Vətən müharibəsi əlillərinə dövlət qayğısı davam edir.

Ölkə rəhbərliyinin şəhid ailələrinə və Vətən müharibəsi əlillərinə diqqət və qayğısı Şirvan şəhərində də davam etdirilir.
    Şirvan Şəhər İcra Hakimiyyətinin təşəbbüsü və təşkilatçılığı ilə şəhərdə yaşayan şəhid ailələri, Vətən müharibəsi əlilləri vaxtaşırı ziyarət edilir, onlara hərtərəfli diqqət və qayğı göstərilir, problemləri ardıcıl həll edilir.
    Bu qayğının davamı olaraq şəhərin Xəqani küçəsi 1/48 saylı ünvanda yaşayan Vətən müharibəsi əlili Məmmədov Mirağa Ağamir oğlu ziyarət edildi. Mirağa Məmmədov 1990-cı ildə Əli Bayramlıda (indiki Şirvan şəhərində) anadan olub. 1996-ci ildə 16 nömrəli orta məktəbin birinci sinfinə daxil olub, sonra təhsilini 20 №li orta məktəbdə davam etdirərək başa vurmuşdur. 2008-2010-cu illərdə Milli Orduda həqiqi hərbi xidmət keçib.
    Ermənistanın Azərbaycana qarşı təxribat və təcavüzlərinə cavab olaraq Milli Ordumuzun əks-hücum əməliyyatları ilə başlayan Vətən müharibəsində Mirağa Məmmədov da kənarda qalmamışdır. O, 29 sentyabr 2020-ci il tarixdə ordu sıralarına səfərbər edilib. Onun Gorandan başlayan döyüş yolu Laçında başa çatıb, orduda təxliyyə xidməti göstərib. 01.12.2020-ci il tarixdə Laçında şəhidlərimizin təxliyyəsi zamanı mənfur ermənilərin sıradan çıxmış sanitar avtomobildə quraşdırdıqları minaya düşərək sağ ayağını itirmişdir. Əvvəlcə Əhmədbəyli hospitalında, sonra isə Bakıda Müdafiə Nazirliyinin Mərkəzi Hospitalında müalicə olunub. Hazırda, III qrup Vətən müharibəsi əlili kimi təqaüd alır.
    Azərbaycan Respublikasının Prezidenti Cənab İlham Əliyevin müvafiq sərəncamları ilə Məmmədov Mirağa Ağamir oğlu “Qubadlınının azad olunmasına görə” və “Zəngilanın azad olunmasına görə” medalları ilə təltif edilmişdir.
    Ziyarət zamanı Vətən müharibəsi əlili Məmmədov Mirağa Ağamir oğlu və ailə üzvləri göstərilən maddi və mənəvi dəstəyə görə ölkə Prezidentinə və Birinci vitse-prezident, çox hörmətli Mehriban xanım Əliyevaya təşəkkürlərini bildirdilər.