Yeni Azərbaycan Partiyasının Şirvan şəhər Təşkilatının yeni sədri Zahir Qəhrəmanov Şirvan şəhər ictimaiyyətinə təqdim olunub.
11 fevral 2022-ci il tarixdə Şirvan Şəhər İcra Hakimiyyətinin başçısı İlqar Abbasov, YAP Şirvan şəhər Təşkilatının yeni sədri Zahir Qəhrəmanov, hüquq-mühafizə orqanlarının, ictimai-siyasi qurumların rəhbərləri və ictimaiyyət nümayəndələri öncə Yeni Azərbaycan Partiyasının qurucusu ümummili lider, Ulu öndər Heydər Əliyevin şəhərin mərkəzi meydanında ucalan abidə kompleksini ziyarət edib, abidə önünə gül-çiçək dəstələri düzərək, əziz xatirəsinə dərin ehtiramlarını ifadə ediblər.
Sonra Yeni Azərbaycan Partiyasının Şirvan şəhər Təşkilatının iclas zalında yeni sədrin təqdimetmə mərasimi keçirilib. Tədbiri giriş sözü ilə Şirvan Şəhər İcra Hakimiyyətinin başçısı İlqar Abbasov açıb. Müstəqil Azərbaycan dövlətinin qurucusu, Yeni Azərbaycan Partiyasının təsisçisi və fəxri sədri, xalqımızın ümummilli lideri Heydər Əliyevin və Vətənimizin müstəqilliyi, suverenliyi, ərazi bütövlüyü uğrunda canından keçən şəhidlərin ruhu bir dəqiqəlik sukutla yad edilib.
Şirvan Şəhər İcra Hakimiyyətinin başçısı İlqar Abbasov YAP Şirvan şəhər Təşkilatına yeni sədr təyin edilən Zahir Qəhrəmanovu şəhər ictimaiyyətinə təqdim edib. Onun həyat və fəaliyyəti barədə tədbir iştirakçılarına məlumat verib. Qeyd edib ki, Yeni Azərbaycan Partiyasının mərkəzi aparatının 3 fevral 2022-ci il tarixdə keçirdiyi videomüşavirədə Zahir Qəhrəmanov YAP şəhər Təşkilatının fəallarına təqdim edilib. Videomüşavirədə iştirak edən YAP fəalları Zahir Qəhrəmanovun sədr təyin edilməsini rəğbətlə qarşılayıb, ona göstərilən etimadı doğruldacağına inandıqlarını ifadə ediblər. Bu gün də Zahir Qəhrəmanovun şəhərdə fəaliyyət göstərən idarə, müəssisə və təşkilat rəhbərlərinə təqdim olunduğunu vurğulayıb. Kökündə Ulu öndər Heydər Əliyevin ideyaları dayanan, dünənin, bu günün və gələcəyin partiyası olan Yeni Azərbaycan Partiyasının qarşıya qoyulan məqsədlərin həyata keçirilməsində bundan sonra da Möhtərəm Prezident cənab İlham Əliyevin ətrafında daha sıx birləşəcəyinə əmin olduğunu bildirib.
Tədbirdə çıxış edən YAP şəhər Təşkilatının sabiq sədr müavini Paşa Nəbiyev, şəhər Təhsil şöbəsinin müdiri Rövşən Allahverdiyev, ilk təşkilat sədri Adəm Hüseynov, 21 nömrəli tam orta məktəbin direktoru Səadət Quliyeva, gənc YAP-çı Elnur Novruzov çıxış edərək Zahir Qəhrəmanovu yaxşı tanıdıqlarını, onun şəhərin ictimai həyatında həmişə fəal iştirak etdiyini, partiyanın prinsiplərinə daim sədaqətli olduğunu, partiya təşkilatına uğurla rəhbərlik edəcəyinə inandıqlarını qeyd ediblər. Partiyanın şəhər Təşkilatının sədri vəzifəsinə belə layiqli namizəd təyin edildiyinə görə YAP-nın Mərkəzi aparatının rəhbərliyinə minnətdarlıqlarını ifadə ediblər.
Tədbirdə çıxış edən Zahir Qəhrəmanov təşkilatın fəaliyyətini müasir tələblər səviyyəsində quracağını, qarşıya qoyulan vəzifələri layiqincə yerinə yetirəcəyini, fəaliyyətində kəmiyyətə deyil, keyfiyyətə daha çox üstünlük verəcəyini vurğulayıb. Ona göstərilən etimada görə partiyanın rəhbərliyinə və tədbir iştiraskçılarına minnətdarlığını bildirib.
Şirvan Şəhər İcra Hakimiyyətinin başçısı İlqar Abbasov YAP şəhər Təşkilatının gələcək fəaliyyətinə uğurlar arzulayaraq tədbirə yekun vurub.
Mətbuat xidməti
