Əməkdar Bədən Tərbiyəsi və İdman Xadimi Vaqif Gözəlovun 80 illik yubileyi qeyd olunub.

17 mart 2022-ci il tarixdə Şirvan şəhər Mədəniyyət Mərkəzində ömrünün 60 ilini idmanın inkişafına həsr edən, “Əməkdar Bədən Tərbiyəsi və İdman Xadimi” fəxri adına və “Tərəqqi” medalına layiq görülmüş məşqçi-müəllim Vaqif Gözəlovun 80 illik yubileyi qeyd olunub.
Yubiley tədbirində Şəhər İcra Hakimiyyətinin başçısı İlqar Abbasov, Şəhər İcra Hakimiyyəti aparatının məsul əməkdaşları,  Şəhər Təhsil şöbəsinin, Şəhər Gənclər və İdman İdarəsinin, Şirvan Dövlət İqtisadiyyat və Humanitar Kollecinin rəhbərləri, ziyalılar, idman xadimləri, ictimaiyyət nümayəndələri, incəsənət nümayəndələri iştirak edib.
Tədbirdən öncə Şirvan Şəhər İcra Hakimiyyətinin başçısı İlqar Abbasov Mədəniyyət Mərkəzinin foyesində Vaqif Gözəlovun həyat yolunu əks etdirən sərgi ilə tanış olduqdan sonra Vaqif Gözəlovu 80 yaşı münasibətilə təbrik edib və ona xoş arzularını bildirib. Ölkəmizdə idmana dövlət qayğısından bəhs edərək, qeyd edib ki, idman sahəsində qazanılan yüksək nəticələrin təməli Ulu Öndər Heydər Əliyev tərəfindən qoyulub və bu gün də Azərbaycan Respublikasının Prezidenti cənab İlham Əliyev və Birinci vitse-prezident, çox hörmətli Mehriban xanım Əliyeva tərəfindən uğurla davam etdirilir. Qabaqcıl idman ölkələrindən biri olan Azərbaycanın hazırda beynəlxalq Olimpiya hərəkatının fəal üzvlərindən biri olduğunu vurğulayıb. Dövlət səviyyəsində həyata keçirilən tədbirlərin davamı olaraq, Şirvan şəhərində müxtəlif idman və bədən tərbiyəsi mərkəzlərinin fəaliyyət göstərdiyini diqqətə çatdırıb. Bundan sonra da ölkə idmanının inkişafına Şirvan şəhər idmançılarının öz töhfələrini verəcəyinə əmin olduğunu bildirib. Vaqif Gözəlovun ömür yolunun gənc idmançılarımız məktəb olduğunu və bu məktəbin yetirmələrinin respublikamızın idman şərəfinin qorunması yolunda uğurla addımladıqlarını diqqətə çatdırıb. Onun zəhmətinin dövlət başçısı tərəfindən dəfələrlə dəyərləndirildiyini, ona təqdim edilən medal və fəxri adların ümumilikdə Şirvan şəhərinin idmanına göstərilən diqqət olduğunu söyləyib.
Sonra Vaqif Gözəlovun həyat yolunu əks etdirən videoçarx nümayiş olunub.
Şəhər İcra Hakimiyyəti başçısının müavini Aynur Fərzəliyeva çıxış  edərək Vaqif Gözəlovu 80 yaşı münasibətilə təbrik edib və ona xoş arzularını bildirib. Qeyd edib ki, 1942-ci il fevralın 16-da dünyaya göz açan Vaqif Gözəlov Şirvan şəhərində boks idman növünün təməlini qoyub və ömrünün çox hissəsini idmanın bu növünə həsr edib. Onun yetirmələri respublika və dünya çempionatlarında yer tutub və mükafatlara layiq görülüblər. Zəhmət və mübarizə ilə keçən ömrünü faydalı işlərə sərf etdiyi üçün şəhərimizin idman tarixində onun adının əbədi yaşayacağını bildirib. Şəhər İcra Hakimiyyəti başçısının Fəxri Fərmanını Vaqif Gözəlova təqdim edib.
Şəhər Təhsil şöbəsinin müdiri Rövşən Allahverdiyev, Şəhər Gənclər və İdman İdarəsinin rəisi Samit Həsənov, Şirvan Dövlət İqtisadiyyat və Humanitar Kollecinin direktoru Bərxudar Bərxudarov, Təhsil İnstitutunun elmi katibi, elmlər doktoru, professor, əməkdar müəllim Akif Abbasov və digərləri Vaqif Gözəlov haqqında xoş təəssüratlarını bölüşüblər.
Tədbirin sonunda Şirvan şəhər Musiqi məktəbinin müəllim və şagirdlərinin ifasında musiqi nömrələri səslənib.

 Mətbuat xidməti