Şirvan şəhərində Novruz bayramı münasibətilə silsilə tədbirlər keçirilib.

19 mart 2022-ci il tarixdə Şirvan Şəhər İcra Hakimiyyətinin təşkilatçılığı ilə xalqımızın qədim tarixini, milli-mənəvi dəyərlərini özündə yaşadan Novruz bayramı münasibəti ilə ümumşəhər bayram şənliyi keçirilib.
Tədbirdən öncə Şirvan Şəhər İcra Hakimiyyətinin başçısı İlqar Abbasov, YAP Şirvan şəhər Təşkilatının sədri Zahir Qəhrəmanov, Şirvan Bələdiyyəsinin sədri Kürdoğlu Muradov, şəhərin hüquq-mühafizə orqanlarının rəhbərləri, təhsil, səhiyyə, sənaye müəssisələrinin rəhbərləri, ictimaiyyət nümayəndələri və şəhid ailələri ilə birlikdə şəhərin mərkəzi meydanında ucalan Ulu öndər Heydər Əliyevin abidəsini ziyarət edib, xatirəsinə ehtiram olaraq abidə önünə gül dəstələri düzüblər.
Sonra Şəhidlər Xiyabanı ziyarət olunub, I Qarabağ müharibəsində itkin düşənlərin şərəfinə ucalan abidənin, “Şəhid anası” memorial abidə kompleksinin və şəhid məzarlarının önünə tər qərənfillər düzülüb, şəhidlərin ruhuna dualar oxunub.
Şirvan Şəhər İcra Hakimiyyətinin başçısı İlqar Abbasov və hüquq-mühafizə orqanlarının rəhbərləri başda olmaqla tədbirə qatılan qonaqları milli geyimdə olan məktəblilər salamlayıb, onlara şərbət, duz-çörək ikram edib və Baharın gəlişinin simvolu olan Səməni bağışlayıblar. Təhsil və mədəniyyət müəssisələrinin müəllim-şagird kollektivlərinin nümayiş etdirdiyi Novruz atributlarından, qədim tarixə malik dulusçuluq, mis məmulatlarından, əl işlərindən, rəsm əsərlərindən  ibarət sərgi tədbir iştirakçılarında xoş təəssüratlar yaradıb. Qonaqlar məktəblilərlə yumurta döyüşdürüb, onların səsləndirdikləri haxıştaları, bayatıları, laylaları dinləyiblər.
Şəhər İcra Hakimiyyətinin başçısı İlqar Abbasovun Vətən müharibəsinin şəhidi Ruslan Rüstəmovun övladları ilə və itgin əsgər anası Ceyran Məmmədova ilə  birlikdə alovlandırdığı möhtəşəm Novruz tonqalının hərarəti onun ətrafına yığışan insanlar tərəfindən böyük coşğu ilə qarşılanıb.
Bayram tədbirini açan Bahar qız, Keçəl, Kosa şənliyə gələn qonaqları salamlayaraq şən və məzəli söhbətləri ilə  onlara bayram əhval-ruhiyyəsi bəxş ediblər. El ağsaqqalı Dədə Qorqud qədim el bayramı münasibətilə xalqımıza xeyir-duasını və arzularını bildirib.
Şirvan Şəhər İcra Hakimiyyətinin başçısı İlqar Abbasov tarixi minilllərlə ölçülən və milli-mənəvi dəyərlərimiz sırasında özünəməxsus yeri olan Novruz bayramı münasibətilə şəhər sakinlərini tədbik edib, onlara möhkəm can sağlığı, xoş ovqat, bahar əhval-ruhiyyəsi və bol ruzi-bərəkət arzulayıb. Təbiətin oyanışı, həyatın yenilənməsi, dirçəlişin rəmzi olan Novruz bayramının insanlar arasında birlik və mehribanlığın möhkəmləndirilməsi, onların bir-birinə mərhəmət və diqqət göstərməsi kimi sağlam təməllər aşıladığını söyləyib. Novruz bayramının ölkəmizdə dövlət səviyyəsində qeyd olunmasının Azərbaycan xalqının Ümummilli lideri, Ulu öndər Heydər Əliyevin adı ilə bağlı olduğunu vurğulayıb. Ümummilli Liderin siyasi kursunu uğurla davam etdirən, milli-mənəvi dəyərlərimizi böyük sevgi ilə yaşadan möhtərəm Prezidentimiz cənab İlham Əliyevin hər il bayram günü xalqımıza bayram təbriki ünvanladığını, bayram şənliklərində iştirak etdiyini və onlarla öz sevincini paylaşdığını vurğulayıb. Milli-mənəvi dəyərlərimizin qorunmasına və dünyada təbliğinə böyük önəm verən, neçə-neçə tarixi-mədəniyyət abidələrinin yenidən qurulmasına, muğam musiqi müsabiqələrinin, beynəlxalq festivalların keçirilməsinə, xarici ölkələrdə müxtəlif sərgilərin təşkilinə, bir çox digər irimiqyaslı layihələrin reallaşmasına nail olan Azərbaycan Respublikasının  Birinci vitse-prezidenti çox hörmətli Mehriban xanım Əliyevanın təşəbbüsü ilə Novruz bayramının YUNESKO-nun qeyri-maddi mədəni irs siyahısına salındığını, BMT Baş Məclisi tərəfindən "Beynəlxalq Novruz Günü" barədə qətnamə qəbul edildiyini diqqətə çatdırıb. Azərbaycan xalqının ümumxalq arzusunun 2020-ci ilin sentyabrın 27-də Silahlı Qüvvələrin Müzəffər Ali Baş Komandanının rəhbərliyi ilə şücaətli Azərbaycan Ordusu tərəfindən gerçəkləşməsindən və ərazi bütövlüyümüz uğrunda başlanan 44 günlük Vətən müharibəsinin Şanlı Qələbə ilə başa çatmasından qürur duyduğunu bildirib. Ölkəmizin müstəqilliyi və ərazi bütövlüyü uğrunda canlarından keçmiş şücaətli Vətən övladlarının xatırəsini yad edib, onlara Allahdan rəhmət, ailələrinə səbir diləyib. İşğaldan azad edilmiş şəhər və kəndlərimizdə yandırılan bayram tonqallarının şəhidlərimizin ruhunu şad edəcəyini ifadə edib. Qeyd edib ki, Qələbədən sonra ölkə başçısı əlamətdar günlərdə ailə üzvləri ilə birlikdə işğaldan azad olunmuş şəhər və rayonlara səfər edir, aparılan abadlıq-quruculuq və bərpa işləri ilə tanış olur, Qarabağımızın yenidən cənnətə çevrilməsi üçün yeni-yeni layihələrin təməlini qoyur. Ölkə başçısının diqqət və qayğısı sayəsində görülən işlər sakinlərimizdə yüksək əhval-ruhiyyə yaradır, qurub-yaratmaq əzmini gücləndirir. Şəhər İcra Hakimiyətinin başçısı İlqar Abbasov dövlətimizin daha da qüdrələnməsini, müstəqilliyinin əbədi olmasını, xalqımızın əmin-amanlıq və firavanlıq şəraitində yaşamasını arzulayıb.
Bayram şənliyində Şirvan şəhərinin incəsənət ustaları, mədəniyyət ocaqlarının bədii özfəaliyyət kollektivləri rəngarəng konsert proqramı ilə çıxış ediblər. Şənlik iştirakçıları milli musiqinin sədaları altında rəqs ediblər.
Şəhərin gənc idmançılarının idmanın müxtəlif növləri üzrə nümunəvi çıxışları izlənilib.
Bayram tədbiri “Cəngi” sədaları ilə başa çatıb.
Tədbirdən sonra Şirvan Şəhər İcra Hakimiyyətinin başçısı İlqar Abbasov  Novruz bayramı münasibətilə 2021-ci il noyabrın 16-da dövlət sərhədində Ermənistanın təxribatları nəticəsində baş verən döyüş əməliyyatları zamanı şəhid olan Əliyev Elçin Ramil oğlunun və  2022-ci ilin yanvarın 29-da Kəlbəcər rayonunda qar çovğununda şəhid olan Azərbaycan Ordusunun zabiti, baş leytenant Bağırov Fuad Allahverdi oğlunun ailələırini ziyarət edib, gündəlik qayğıları ilə maraqlanıb.

 Mətbuat xidməti