Şirvanda Ümummilli lider Heydər Əliyevin xatirəsinə həsr olunmuş şahmat turniri keçirilib.

Müstəqil Azərbaycan dövlətinin memarı və qurucusu Ümummilli lider Heydər Əliyevin anadan olmasının 99-cu ildönümü ölkəmizin hər yerində olduğu kimi, Şirvan şəhərində də geniş qeyd olunur.
Şirvan Şəhər İcra Hakimiyyətinin Tədbirlər planına uyğun olaraq, şəhərin idarə, müəssisə və təşkilatlarında, səhiyyə, təhsil və mədəniyyət ocaqlarında Ulu öndər Heydər Əliyevin anadan olmasının 99-cu ildönümünə həsr olunmuş silsilə tədbirlər, video-konfranslar, sərgilər təşkil edilir. Onun elmi-nəzəri irsi, idarəetmə fəlsəfəsi öyrənilir.
28 aprel 2022-ci il tarixdə Ümummilli lider Heydər Əliyevin əziz xatirəsinə həsr olunmuş Şahmat turniri Ulu Öndərin abidəsi qarşısında onun ziyarəti ilə başlayıb. Şirvan Şəhər İcra Hakimiyyətinin nümayəndəsi Samirə İsmayılova, Şirvan şəhər Uşaq Gənclər İdman-Şahmat məktəbinin direktoru Ramil Tağıyev və məktəbin kollektivi Ulu öndərin abidəsi önünə gül-çiçək dəstələri qoyaraq əziz xatirəsinə ehtiramlarını ifadə ediblər.
Sonra Heydər Əliyev Mərkəzində Ulu öndərin həyat və fəaliyyətini əks etdirən eksponantlarla tanış olublar. Mərkəzin direktor əvəzi Fəridə Yahyayeva Ümummilli liderin mənalı ömür yolundan, həyat və fəaliyyətinin mühüm məqamlarından danışıb.
Yarışın açılış mərasimi Şirvan şəhər Uşaq Gənclər İdman-Şahmat məktəbində keçirilib. Ümummilli lider Heydər Əliyevin və vətənimizin müstəqilliyi və ərazi bütövlüyü uğrunda şəhid olanların əziz  xatirəsi bir dəqiqəlik sükutla yad edilib. Yarışda məktəbin 100-ə yaxın şahmatçısı mübarizə aparır. İştirakçılara yarışın keçirilmə qaydaları elan olunub və qalib idmançıların məktəbin rəhbərliyi tərəfindən diplom, medal və digər hədiyyələrlə təltif olunacaqları barədə məlumat verilib.
Şəhər İcra Hakimiyyətinin nümayəndəsi Samirə İsmayılova və Şirvan şəhər Uşaq Gənclər İdman-Şahmat məktəbinin direktoru Ramil Tağıyev yarış iştirakçılarına uğurlar arzu edərək onlarla xatirə şəkli çəktiriblər.

 Mətbuat xidməti