Ali məktəblərə qəbul imtahanlarında ən yaxşı nəticələr göstərən şagirdlərimizin adı açıqlanıb.
Dövlət İmtahan Mərkəzi (DİM) tərəfindən tam (11 illik) orta təhsil səviyyəsi üzrə bu il keçirilən buraxılış və ali məktəblərə qəbul imtahanlarının nəticələri elan olunub. Şirvan şəhəri üzrə 724 məzundan 444 məzun imtahanlarda iştirak edib. Onlardan 18 nəfəri 600 baldan yuxarı, 22 nəfəri isə 500-600 arası bal toplayıb.
Şirvan şəhər Bəhruz Aslanov adına 16 nömrəli məktəbin məzunu Ağamalıyev Əhməd 678 bal toplayaraq şəhər üzrə ən yüksək nəticəni göstərib. Şirvan Dövlət İqtisadiyyat və Humanitar Kollecinin məzunu Yaqubov Sənan 665,3 bal, Şirvan şəhər 18 nömrəli təbiət humanitar təmayüllü məktəb liseyin məzunu Əlizadə Orxan 647 bal toplayaraq növbəti pillələrdə yer alıblar.
Qəbul imtahanlarında yüksək nəticələr göstərən şagirdlərimizi təbrik edir, onlara gələcək təhsil pillələrində müvəffəqiyyətlər arzulayırıq.
Mətbuat xidməti
