Bu gün 44 günlük Vətən müharibəsi şəhidi Namiq Xəlilovun doğum günüdür.

Vətən uğrunda gedən döyüşlərdə torpaqlarımızı işğaldan azad edərək xalqımıza Qələbə sevinci bəxş edən, bu yolda canından, qanından keçən qəhrəman Vətən oğullarından biri olan şəhid gizir Xəlilov Namiq İlyas oğlu 15 iyun 1992-ci ildə Şirvan şəhərində anadan olub. Şirvan şəhər 11 №li tam orta məktəbi bitirib. Xüsusi Təyinatlı Qüvvələrdə xidmət edib. Aprel döyüşlərində və Vətən müharibəsi zamanı Füzuli, Kəlbəcər, Cəbrayıl və Xocavənd istiqamətlərində gedən döyüşlərdə iştirak edib. 17 oktyabr 2020-ci ildə şəhidlik zirvəsinə ucalan şəhid Namiq Xəlilov Şirvan şəhər Şəhidlər Xiyabanında dəfn edilib. Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, qarşıya qoyulmuş tapşırıqların icrası zamanı vəzifə borcunu şərəflə yerinə yetirərək göstərdiyi şücaət və qəhrəmanlıqlara görə şəhid Namiq Xəlilov Azərbaycan Respublikasının Prezidenti cənab İlham Əliyevin müvafiq sərəncamları ilə “Azərbaycan Bayrağı” ordeni, 3-cü dərəcəli “Hərbi xidmətdə fərqlənməyə görə”, “Hərbi xidmətlərə görə”, “Azərbaycan Respublikası Silahlı Qüvvələrinin 95 illiyi”, “Azərbaycan Ordusunun 100 illiyi”, “Vətən uğrunda”, “Şücaətə görə”, ”Füzulinin azad olunmasına görə”,  ”Kəlbəcərin azad olunmasına görə”, ”Cəbrayılın azad olunmasına görə”, “Xocavəndin azad olunmasına görə” medalları ilə təltif olunub. Allah rəhmət eləsin!