Sakinlərlə növbəti səyyar görüş Şirvan şəhər Mədəniyyət Mərkəzində keçirilib.
23 fevral 2023-cü ildə Şirvan şəhər Mədəniyyət Mərkəzində keçirilən şəhər sakinləri ilə növbəti səyyar görüşdə Şirvan Şəhər İcra Hakimiyyətinin başçısı İlqar Abbasovla birlikdə Milli Məclisin deputatı İltizam Yusifov, Dövlət Təhlükəsizliyi Xidmətinin Şirvan şəhər şöbəsinin rəisi Mehman Qasımov, YAP Şirvan şəhər təşkilatının sədri Zahir Qəhrəmanov, Şəhər İcra Hakimiyyəti başçısının müavinləri, məsul əməkdaşları, əlaqədar təşkilat və xidmət sahələrinin rəhbərləri iştirak edib. Öncə müstəqilliyimizin memarı, Ümummilli lider Heydər Əliyevin, ölkəmizin ərazi bütövlüyü, suverenliyi və tarixi torpaqlarımızın azad edilməsi uğrunda gedən döyüşlərdə qəhrəmancasına həlak olan şəhidlərin və Qardaş Türkiyə Respublikasında baş vermiş zəlzələ qurbanlarının xatirəsi bir dəqiqəlik sükutla yad edilib. Şəhər İcra Hakimiyyətinin başçısı İlqar Abbasov qəbulda iştirak edən şəhər sakinlərini salamlayaraq, regionların inkişafı üzrə dövlət proqramlarından, əhalinin sosial vəziyyətinin yaxşılaşdırılması istiqamətində qəbul edilən fərman və sərəncamlardan bəhs edib. 2 il əvvəl dünyanı bürüyən koronavirus infeksiyasına qarşı ölkəmizdə həyata keçirilən mübarizə tədbirlərindən, dünyanın ən inkişaf etmiş ölkələrinin də çətinliklərlə üzləşdiyi bir vaxtda Azərbaycanın pandemiyadan müvəffəqiyyətlə çıxmasından söz açıb. Eyni vaxtda həm pandemiya ilə, həm də mənfur düşmənlə mübarizə aparılmasına baxmayaraq, heç bir sosial layihənin dayandırımadığını, iqtisadi tempin yüksələn xətt üzrə inkişaf etdiyini, genişmiqyaslı abadlıq-quruculuq işlərinin həyata keçirildiyini xatırladıb. Ölkə ərazisində tətbiq edilən məhdudiyyətlərin bir qisminin aradan qaldırıldığını, hər ay şəhərin müxtəlif ərazilərində 4 səyyar görüşün təşkil edildiyini və vətəndaş müraciətlərinə xüsusi həssaslıqla yanaşıldığını diqqətə çatdırıb. Şəhər ərazisində park və xiyabanların əsaslı təmir edildiyini, yeni nümunəvi məhəllələrin salındığını, şəhərin su-kanalizasiya sisteminin müasir tələblər səviyyəsində mərhələlərlə yenidən qurulduğunu, 143 küçənin tam işıqlandırıldığını, MİDA-nın sifarişi ilə şəhər ərazisində sosial evlərin tikintisi üçün 8,14 ha torpaq sahəsinin ayrıldığını diqqətə çatdırıb. Heydər Əliyev Fondunun vitse-prezidenti, İDEA İctimai Birliyinin rəhbəri Leyla Xanım Əliyevanın “Bizim həyət” layihəsi əsasında Bakıdan sonra regionlardan ilk dəfə Şirvanda 3 məhəllənin abadlaşdırıldığını qeyd edib. 76 çoxmənzilli yaşayış binasının 73-də zirzəmilərindəki çirkab suların çəkilməsi işlərinin başa çatdırıldığını vurğulayıb. Məhəmməd Füzuli adına Mədəniyyət və İstirahət Parkında aparılan yenidənqurma işlərinin şəhər sakinlərinin və qonaqların mədəni istirahətinə xidmət etdiyini və sakinlər tərəfindən xoş təssüratla qarşılandığını bildirib.“Heydər Əliyev İli” çərçivəsində Heydər Əliyev meydanındakı fəvvarənin və Heydər Əliyev adına mədəniyyət və istirahət parkında fəvvarə və şəlalənin əsaslı təmir olunaraq sakinlərin istifadəsinə verildiyini vurğulayıb. Şəhidlər Xiyabanında aparılan abadlıq-bərpa işlərindən, şəhid adların əbədiləşdirlməsi istiqamətində həyata keçirilən tədbirlərdən, şəhid ailələrinə və müharibə iştirakçılarına göstərilən diqqət və qayğıdan bəhs edib. Milli Məclisin deputatı İltizam Yusifov çıxış edərək, 30 ildən sonra şanlı Azərbaycan ordusunun torpaqlarımızı azad etməsindən qürur duyduğunu, ümumxalq dərdimizin zəfərlə sonlandığını, dövlət-ordu-xalq birlinin daha da möhkəmləndiyini qeyd edib. Hazırda xalqımızın daha çox birlik nümayiş etdirməsinin vacib olduğunu, son günlər beynəlxalq arenada müzakirə olunan qlobal enerji təhlükəsizliyi və su ehtiyatlarından səmərəli istifadə ilə bağlı ətraflı məlumat verib. Şəhər ərazisində sərnişindaşıma ilə bağlı yaranan bəzi problemlərə toxunub. Sonra qəbula gələn sakinlər dinlənilib, onları narahat edən məsələlər və problemlər aidiyyəti məsul şəxslərin iştirakı ilə müzakirə edilib. Vətəndaşların müraciətlərinin bir qismi yerindəcə həll olunub, bəzi müraciətlərin həlli ilə bağlı müvafiq göstərişlər verilib və nəzarətə götürülüb. Sakinlər onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident, hörmətli Mehriban xanım Əliyevaya dərin təşəkkürlərini və minnətdarlıqlarını ifadə ediblər.
Mətbuat xidməti
