Şəhər İcra Hakimiyyətinin başçısı dekabr ayının sonuncu cümə axşamı şəhid ailəsi üzvləri ilə birlikdə Şəhidlər xiyabanını ziyarət edib.

Dekabrın 25-də Şirvan Şəhər İcra Hakimiyyətinin başçısı İlqar Abbasov, YAP Şirvan şəhər təşkilatının sədri Zahir Qəhrəmanov, şəhər İcra Hakimiyyəti başçısının müavinləri və Aparatının əməkdaşları, idarə və müəssisələrin nümayəndələri, din xadimləri və şəhid ailəsi üzvləri ilə birlikdə Şəhidlər xiyabanını ziyarət ediblər.

Ziyarət zamanı öncə Birinci Qarabağ müharibəsində Şirvan şəhərindən itkin düşən şəhidlərin xatirəsinə ucaldılmış abidənin önünə tər güllər düzülüb. Sonra Birinci və İkinci Qarabağ müharibəsi şəhidlərinin məzarları ziyarət olunub, ailələrinə səbir dilənib.

Şəhid analarının şərəfinə ucaldılan “Şəhid Anası” memorial abidə kompleksi ziyarət edildikdən sonra şəhər İcra Hakimiyyətinin başçısı İlqar Abbasov çıxış edərək, ölkəmizin müstəqilliyi, suverenliyi və ərazi bütövlüyü uğrunda şəhid olan qəhrəman övladlarımızın əziz xatirəsinin dövlətimiz və xalqımız tərəfindən həmişə olduğu kimi, bundan sonra da daim uca tutulacağını vurğulayıb. Möhtərəm Prezidentimiz cənab İlham Əliyev və Birinci vitse-prezident hörmətli Mehriban xanım Əliyeva tərəfindən şəhid ailəsi üzvlərinə və müharibə iştirakçılarına dövlət səviyyəsində göstərilən yüksək diqqət və qayğıdan söz açıb, bu qayğının Şirvan şəhərində də davam etdirildiyini qeyd edib.

İlqar Abbasov həmçinin 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə şəhid ailələrinin üzvlərini təbrik edib, hər birinə xoş arzularını çatdırıb.

Sonra şəhid ailəsi üzvlərini narahat edən məsələlərlə bağlı müraciət və təklifləri dinlənilib, aidiyyəti üzrə həlli üçün müvafiq tapşırıqlar verilib. Görüşdə iştirak edən şəhid ailələrinin üzvləri göstərilən diqqət və qayğıya görə möhtərəm Prezidentimiz cənab İlham Əliyevə və Birinci-vitse prezident hörmətli Mehriban xanım Əliyevaya minnətdarlıqlarını bildiriblər.

Allah bütün şəhidlərimizə rəhmət eləsin!