Şirvan məktəbliləri SAF 2022-də 32 medal qazanıblar.

5-9 dekabr tarixlərində Elm və Təhsil Nazirliyinin dəstəyi ilə Bakı Ekspo Mərkəzində Beynəlxalq STEAM Azərbaycan Festivalı 2022 (SAF 2022) keçirilib. SAF 2022-yə ümumilikdə 350 komandadan 1500-dək iştirakçı qatılıb.  Onlardan 127-si xarici ölkə, 1300-ü isə yerli iştirakçı olub. Əcnəbi iştirakçılar Türkiyə, Böyük Britaniya, İsveç, Estoniya, Özbəkistan, Qazaxıstan və Türkmənistanı təmsil ediblər. SAF 2022-nin yekununda 43 komanda I, 102 komanda II, 108 komanda isə III yerə layiq görülüb.  Şirvan şəhər Kimya-biologiya təmayüllü liseyin nəzdində fəaliyyət göstərən Şirvan STEAM Mərkəzi Festivalda öz layihələri ilə iştirak edib və uğurlu nəticələr ilə yadda qalıb. Belə ki, 10 kateqoriyada keçirilən bu yarışda komandalarımız 3 kateqoriya üzrə 12 qızıl, 9 gümüş, 11 bürünc (ümumilikdə 32 medal) medal qazanıb və 6 nominasiya üzrə uğurlu nəticələr göstərib. STEAM Azərbaycan Festivalı 2022-nin bağlanış mərasimində Elm və Təhsil naziri Emin Əmrullayev, Azərbaycan Milli Elmlər Akademiyasının prezidenti İsa Həbibbəyli, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, digər dövlət qurumlarının rəsmiləri, millət vəkilləri, diplomatik nümayəndəliklərin təmsilçiləri, ali təhsil müəssisələrinin rəhbərləri, elmi-tədqiqat institutlarının direktorları iştirak ediblər.  Festivalın bağlanış mərasimində qalib komandalara mükafatlar təqdim edilib. 

Mətbuat xidməti