Şirvan Şəhər İcra Hakimiyyəti yanında İctimai Şuranın iclası keçirilib.
Aprelin 2-də dövlət orqanlarında ictimai iştirakçılığın tətbiqinin genişləndirilməsi, Şuranın fəaliyyətinin səmərəliliyinin artırılması məqsədilə şəhər İcra Hakimiyyəti yanında İctimai Şuranın iclası keçirilib.
İclasda şəhər İcra Hakimiyyəti başçısının müavini Aynur Fərzəliyeva, Şuranın üzvləri, şəhərdə fəaliyyət göstərən vətəndaş cəmiyyəti inistitutlarının nümayəndələri, ziyalılar iştirak ediblər.
Şirvan Şəhər İcra Hakimiyyəti yanında İctimai Şuranın sədri Fəxrəddin Rəhimov çıxış edərək, dövlət başçısı tərəfindən Azərbaycanda vətəndaş cəmiyyəti institutlarının fəaliyyətinin genişləndirilməsindən, qeyri-hökumət təşkilatlarının dövlət idarəçiliyi və qanun yaradıcılığı prosesinin iştirakçısına çevrilməsindən danışıb.
Fəxrəddin Rəhimov iclas iştirakçılarına əvvəlki iclasda qaldırılan məsələlərin həlli ilə bağlı görülən işlərdən danışıb və qeyd edib ki, iclasda qaldırılmış problemlər, verilən təkliflər şəhər İcra Hakimiyyətinə çatdırılmış, həmin məsələlərin bir qismi həll edilmiş, digər məsələlər Şirvan şəhərinin 2024-2028-ci illər üçün “Yeniləşən Şirvan” sosial-iqtisadi inkişaf proqramında nəzərdə tutulmuşdur.
Şəhər İcra Hakimiyyəti başçısının müavini Aynur Fərzəliyeva Şuranın fəaliyyətində şəhər ziyalıları və sakinlər ilə daha sıx təmasda olmağın faydasını vurğulayaraq, aktuallıq kəsb edən məsələlərə, şəhərdə görülən abadlıq-quruculuq, ekoloji maarifləndirmə və sosial-infrastruktur layihələrinin icrası ilə əlaqədar görülən işlər barədə vətəndaşların müntəzəm olaraq məlumatlandırıldığını qeyd edib.
