Şirvan Şəhər İcra Hakimiyyətinin başçısı 18 nömrəli təbiət humanitar təmayüllü məktəb-liseydə şəhər sakinləri ilə görüş keçirib.

Şirvan Şəhər İcra Hakimiyyətində təsdiq edilmiş qrafikə uyğun olaraq 23 iyun 2022-ci il tarixdə 18 nömrəli təbiət humanitar təmayüllü məktəb-liseyinin akt zalında vətəndaşlarla növbəti səyyar görüş keçirilib.

Görüşdə Şəhər İcra Hakimiyyətinin başçısı İlqar Abbasov, Şəhər İcra Hakimiyyəti başçısının müavinləri, məsul əməkdaşları, şəhərdə fəaliyyət göstərən xidmət təşkilatlarının rəhbərləri və ictimaiyyət nümayəndələri iştirak edib.

Görüş iştirakçıları öncə məktəbin foyesində məktəblilərin əl işlərindən ibarət olan “Şuşa ili”nə həsr edilmiş sərgi ilə tanış olublar.

Səyyar görüşün əvvəlində ölkəmizin ərazi bütövlüyü, müstəqilliyi, suverenliyi uğrunda şəhid olanların əziz xatirəsi bir dəqiqəlik sükutla yad edilib.

Şəhər İcra Hakimiyyətinin başçısı İlqar Abbasov görüş işirakçılarını salamladıqdan sonra, bu gün ölkəmizdə dövlət qulluqçularının peşə bayramının qeyd edildiyini bildirib və dövlət qulluğunda çalışanları təbrik edib. Ölkə başçısının da bildirdiyi kimi, dövlət qulluqçusunun ən mühüm vəzifəsinin dövlətin mənafeyinə və vətəndaşlara xidmət göstərmək olduğunu söyləyib. Bu il də dövlət büdcəsinin sosialyönümlü müəyyənləşdirilməsi, əhalinin sosial müdafiəsinə və rifah halının yüksəldilməsinə yönəlmiş dövlət qərarlarının icrası barədə ətraflı məlumat verib. 2020-ci ildə bütün dünyanın ağır sınaqlarla üz-üzə qaldığı vaxtda Azərbaycanın pandemiya ilə mübarizə tədbirlərinə görə ən inkişaf etmiş ölkələrə nümunə olduğunu, qısa müddətdə yeni modul tipli xəstəxanalrın yaradıldığını, səhiyyə ocaqlarının müasir tibbi avadanlıqlarla təchiz edildiyini xatırladıb. Təhlükəli virusa qarşı mübarizə ilə yanaşı, ölkəmizin ikinci bir cəbhədə torpaqlarımızın işğaldan azad edilməsi uğrunda 44 günlük zəfər yürüşü həyata keçirdiyini, sonunda Müzəffər Ali Baş Komandanın rəhbərliyi ilə rəşadətli Azərbaycan Ordusunun tarixi Qələbə qazandığını diqqətə çatdırıb. Vətənimizin ərazi bütövlüyü uğrunda şəhid olanlara Allahdan rəhmət, ailələrinə səbir, qazilərə şəfa diləyib. Azərbaycanın ədalətli mövqeyinin və həqiqətlərinin beynəlxalq aləmdə geniş təbliğ edilməsində Birinci vitse-prezident Mehriban xanım Əliyevanın və Leyla xanım Əliyevanın rəhbərliyi ilə Heydər Əliyev Fondu tərəfindən keçirilən tədbirlərdən, beynəlxalq humanitar forumlardan, dünyanın dini liderlərinin Bakıda keçirilən görüşündən danışıb. Ölkə başçısının Özbəkistana səfəri zamanı qardaş ölkə tərəfindən məhəbbətlə və təntənə ilə qarşılanmasından qürur hissi keçirdiyini bildirib və bu görüşün ikitərəfli əlaqələrin daha da dərinləşməsinə və şaxələnməsinə töhfə verəcəyini qeyd edib. Sonra İlqar Abbasov şəhər ərazisində genişmiqyaslı tikinti, abadlıq-quruculuq işlərinin həyata keçirildiyini, park və yaşıllıq zolaqlarının salındığını, mərkəzi və məhəllədaxili yolların asfaltlandırıldığını, küçələrin işıqlandırıldığını, su təchizatının və kanalizasiya sisteminin yenidən qurulduğunu, bir sıra sosial layihələrin reallaşdığını diqqətə çatdırıb. Dövlət səviyyəsində görülən işlərin, atılan addımların hər birinin vətəndaş məmnunluğunun artırılmasına, əhalinin sosial müdafiəsinə və rifah halının yüksəldilməsinə xidmət etdiyni söyləyib.

Səyyar qəbulda sakinlərin arzu və təklifləri həssaslıqla dinlənilib, səsləndirdikləri məsələlər məsul şəxslərin iştirakı ilə yerindəcə araşdırılaraq, həlli ilə bağlı tədbirlər müəyyənləşdirilib. Həlli vaxt tələb edən məsələlər nəzarətə götürülməklə həlli ilə bağlı aidiyyəti təşkilat rəhbərlərinə müvafiq tapşırıqlar verilib. Vətəndaşların müraciətləri əsasən mənzil, işsizlik, torpaq sahəsinin sənədləşməsi, müalicə, əlilliyin təyin olunması və digər məsələlərlə bağlı olub.

Görüşdə iştirak edən şəhər sakinləri səyyar görüşlərin təşkilinə və onların problemlərinin həlinə yaradılan şəraitə görə ölkə Prezidenti cənab İlham Əliyevə və Birinci vitse-prezident, çox hörmətli Mehriban xanım Əliyevaya minnətdarlıqlarını ifadə ediblər.

 

Mətbuat xidməti