Şirvan Şəhər İcra Hakimiyyətinin başçısı İlqar Abbasovun Novruz bayramı münasibəti ilə təbriki
19 mart 2023 | 21:20
Şirvan Şəhər İcra Hakimiyyətinin başçısı
İlqar Abbasovun Novruz bayramı münasibəti ilə
T ə b r i k i
Əziz həmvətənlər!
Hörmətli şirvanlılar!
Sizi xalqımızın milli-mədəni sərvətlər xəzinəsində xüsusi yeri olan Novruz bayramı münasibətilə səmimi qəlbdən təbrik edir, hər birinizə can sağlığı, bahar əhval-ruhiyyəsi, səadət dolu günlər arzulayıram.
Təbiətin oyanışı, həyatın yenilənməsi, dirçəlişin rəmzi olan Novruz ümumxalq bayramı kimi uzun əsrlərdən bəri yurdumuzun hər bir guşəsində olduğu kimi, Şirvanda da böyük ruh yüksəkliyi ilə qeyd edilir. Ulu Tanrıya, kainatın nizamına və ana təbiətə sonsuz sevginin parlaq ifadəsi olan bu bayramın qədim ənənələrinin bütün rəngarəngliyi ilə qorunub saxlanılması Azərbaycan xalqının öz tarixi-mədəni keçmişinə yüksək ehtiramını və milli-mənəvi dəyərlərə dərin bağlılığını nümayiş etdirir.
Ümummilli lider Heydər Əliyevin respublikamıza rəhbərliyi dövründə Novruz bayramının dövlət səviyyəsində qeyd edilməsi tarixi köklərə qayıdışın parlaq nümunəsi olmaqla yanaşı, xalqımızın həmrəyliyini və bütövlüyünü təcəssüm etdirmişdir.
Azərbaycan Respublikasının Prezidenti cənab İlham Əliyev həmin ənənələrin müqəddəs ərməğan kimi uca tutulmasına çalışır, hər il Novruz ümumxalq bayramı kimi yurdumuzun hər bir guşəsində müxtəlif el şənlikləri və mərasimlərlə qarşılanır, paytaxtın mərkəzi küçə və meydanları əsl bayram əhval-ruhiyyəsində bəzədilir.
Azərbaycan Respublikasının Birinci vitse-prezidenti, hörmətli Mehriban xanım Əliyevanın təşəbbüsü və dəstəyi ilə Novruz bayramının UNESKO-nun qeyri-maddi irs siyahısına daxil edilməsi, BMT-nin Baş Assambleyası tərəfindən 21 martın “Beynəlxalq Novruz Günü” elan olunması bu bayramı beynəlxalq səviyyəli tədbirə çevirmiş, Azərbaycanı qədim sivilizasiyanın mərkəzlərindən biri kimi tanıtmışdır.
Artıq 3-cü ildir ki, bahar fəslini xalqımızın tarixinə qızıl hərflərlə yazılan Şanlı Zəfərin sevinci və qüruru il qarşılayırıq. Müzəffər Ali Baş Komandanın Dəmir yumruğunda birləşən qəhrəman əsgər və zabitlərimizin 44 günlük Vətən müharibəsində əzəli torpaqlarımızı işğaldan azad etməsi ilə qazandığı Tarixi Zəfər Azərbaycana əbədi bahar gətirmişdir. İnanırıq ki, yaz fəslinin qurub-yaratmaq əzmimizi artıran yeniləşdirici ab havası ilə doğma torpaqlarımız qısa müddətdə dirçələcək və yenidən cənnətə çevriləcəkdir.
Bu bayram günlərində Vətənimizin ərazi bütövlüyü naminə canlarını fəda etmiş qəhrəman övladlarımıza rəhmət diləyir, onların əziz xatirəsini dərin ehtiramla yad edirik.
Əziz şirvanlılar, bir daha sizləri təbiətin oyanmasının və yenilənməsinin rəmzi olan Novruz bayramı münasibətilə təbrik edir, sizə xoşbəxtlik, firavanlıq, ölkəmizə əmin-amanlıq, tərəqqi arzulayıram. Bu bayram hər bir ailəyə bol ruzi-bərəkət və xoş ovqat gətirsin!
Novruz bayramınız mübarək!
Hörmətlə,
İlqar Abbasov
Keçidlər
