Şirvanda Bədən Tərbiyəsi və İdman Gününə həsr olunmuş tədbir keçirilib.
3 mart 2023-cü il tarixdə Şirvan şəhər Məhəmməd Füzuli adına Mədəniyyət və İstirahət parkında Şirvan Şəhər İcra Hakimiyyətinin və Gənclər və İdman İdarəsinin birgə təşkilatçılığı ilə 5 Mart – Bədən Tərbiyəsi və İdman Gününə həsr olunmuş ümumşəhər tədbiri keçirilib.Tədbirdən öncə Şəhər İcra Hakimiyyətinin başçısı İlqar Abbasov, YAP Şirvan şəhər təşkilatının sədri Zahir Qəhrəmanov, İcra Hakimiyyəti başçısının müavini Aynur Fərzəliyeva, Gənclər və İdman idarəsinin rəisi Samit Həsənov, idman məktəblərinin rəhbərləri, veteran və gənc idmançıların iştirakı ilə Ulu öndər Heydər Əliyevin abidəsi ziyarət olunub, xatirəsinə ehtiram əlaməti olaraq önünə gül dəstələri düzülüb.
Sonra Şirvan şəhər Məhəmməd Füzuli adına Mədəniyyət və İstirahət parkında “Cəngi” sədaları altında şəhərin yeniyetmə və gənc idmançılarının idmanın müxtəlif növləri üzrə nümunəvi çıxışları izlənilib. Şəhər İcra Hakimiyyətinin başçısı müxtəlif respublika və beynəlxalq yarışlarda uğurlu nəticələr qazanmış idmançılarla görüşüb, onların nailiyyətləri ilə bağlı xoş söhbətlər aparıb.
Tədbir Dövlət Himninin səsləndirilməsi ilə başlayıb. Ulu öndər Heydər Əliyevin və Vətənimizin azadlığı, müstəqilliyi, suverenliyi, ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükütla yad edilib.
Şirvan Şəhər Gənclər və İdman İdarəsinin rəisi Samit Həsənov ölkəmizdə idmanın tarixi, keçdiyi inkişaf yolu və bugünki nailiyyətləri barədə məlumat verib. Ötən illər ərzində yeniyetmə və gənclərin asudə vaxtının səmərəli təşkilində, sağlam və gümrah böyüməsində, onların hərbi-vətənpərvərlik tərbiyəsində, fiziki hazırlığında, nəcib keyfiyyətlərə yiyələnməsində Gənclər və İdman İdarəsinin həyata keçirdiyi tədbirlərdən danışıb.
Şirvan Şəhər İcra Hakimiyyətinin başçısı İlqar Abbasov çıxış edərək, idmançıları və idmansevərləri Bədən Tərbiyəsi və İdman Günü münasibətilə təbrik edərək, onlara idmanın inkişafında və gələcək yarışlarda uğurlar arzulayıb. Bədən tərbiyəsi və idmanın Azərbaycan dövləti üçün hər zaman prioritet sahələrdən birini təşkil etdiyini bildirib. Qeyd edib ki, ölkəmizin idman sahəsində qazandığı yüksək nəticələrin təməli Ulu Öndər Heydər Əliyev tərəfindən qoyulub və bu gün də Azərbaycan Respublikasının Prezidenti cənab İlham Əliyev və Birinci vitse-prezident, hörmətli Mehriban xanım Əliyeva tərəfindən uğurla davam etdirilir. Qabaqcıl idman ölkələrindən biri olan Azərbaycanın hazırda beynəlxalq Olimpiya hərəkatının fəal üzvlərindən biri olduğunu vurğulayıb. Dövlət səviyyəsində həyata keçirilən tədbirlərin davamı olaraq, Şirvan şəhərində müxtəlif idman və bədən tərbiyəsi mərkəzlərinin fəaliyyət göstərdiyini diqqətə çatdırıb. Bundan sonra da ölkə idmanının inkişafına Şirvan şəhər idmançılarının öz töhfələrini verəcəyinə əmin olduğunu bildirib.
Sonra çıxış edən YAP Şirvan şəhər təşkilatının sədri Zahir Qəhrəmanov ölkəmizdə idmana olan dövlət qayğısından, bu sahədə həyata keçirilən tədbirlərdən, idman və bədən tərbiyəsinin inkişafı, kütləviliyin təmin edilməsi məqsədilə görülən işlərdən danışıb. Gənc idmançıları əldə etdikləri nailiyyətlər münasibətilə təbrik edib və uğurlarının davamlı olacağına əminliyini bildirib. Daha sonra bir qrup idmançı və məşqçi müəllimlər idman sahəsində qazandığı nailiyyətlərə və şəhərin ictimai həyatında fəal iştirakına görə Şirvan Şəhər İcra Hakimiyyəti başçısının və Gənclər və İdman idarəsinin Fəxri fərmanları ilə təltif olunub.
Təltif olunanlar idmançılara göstərilən diqqət və qayğıya görə ölkə rəhbəri cənab İlham Əliyevə və Birinci vitse-prezident, hörmətli Mehriban xanım Əliyevaya minnətdarlıqlarını bildiriblər və əvvəlki illərdə olduğu kimi növbəti illərdə də yeni-yeni qələbələr qazanacaqlarını qeyd ediblər. Sonda Zəfər abidəsinin önündə idmançılarla, eləcə də respublikadan kənar idman yarışlarında qalib gələn idmançılarımızla xatirə şəkli çəkilib.
Mətbuat xidməti
