Şirvanda növbəti 4 küçədə asfaltlanma işləri başa çatdırılıb.
Şirvan şəhəri ərazisində aparılan genişmiqyaslı abadlıq-quruculuq işləri çərçivəsində küçələrin asfaltlanması işləri mərhələli şəkildə davam etdirilir. Bir neçə gün əvvəl xəbər verdiyimiz kimi, artıq şəhərin Heydər Əliyev, Amal Alışanlı, Ziya Bünyadov küçələrində asfaltlanma işləri başa çatıb, şəhər sakinlərinin istifadəsinə verilib. Hazırda şəhərin Rəşid Behbudov (Naxçıvan küçəsində “Bizim ev” tikinti materiallarının satışı obyektinin yanı), Babək (keçmiş Xəqani, hazırki Əliş Ləmbəranski küçəsindən sola 1-ci küçə), Şəhid Namiq Xəlilov (keçmiş Energetik küçəsi, Elxan bulağı kafesinin yanından düz), Şəhid Mahir Mirzəyev küçələrində, Şirvan-Salyan avtomobil yolundan sağa tərəf olan ərazidə asfalt-bərpa işləri tamamlanmış, şəhər sakinlərinin rahat gediş-gəlişi üçün müvafiq tədbirlər həyata keçirilmişdir. Qeyd edək ki, aparılan təmir-tikinti işləri çərçivəsində küçələr boyu zəruri olan yerlərdə köhnə örtük sökülür və yararsız qrunt qazılaraq çıxarılır, əvəzinə yararlı material tökülərək kipləşdirilir. Daha sonra yeni asfalt-beton örtüyü döşənir.
Mətbuat xidməti
