Şirvanda şahmat turnirinə start verilib.

Dekabrın 9-da Şirvan şəhər Uşaq Gənclər İdman-Şahmat Məktəbi PHŞ-də Ümummilli lider Heydər Əliyevin əziz xatirəsinə həsr olunmuş şahmat idman növü üzrə qruplararası turnirə start verilib. Turnirin 14 dekabr tarixinədək davam edəcəyi nəzərdə tutulub.

​Turnirin açılış mərasimində öncə Azərbaycan Respublikasının Dövlət Himni səsləndirilib, Ulu Öndər Heydər Əliyevin və ölkəmizin ərazi bütövlüyü uğrunda canından keçən şəhidlərin əziz​ xatirəsi bir dəqiqəlik sükutla yad edilib.

Şirvan şəhər Uşaq Gənclər İdman-Şahmat məktəbinin direktoru Ramil Tağıyev turniri giriş sözü ilə açıb, qonaqları və yarış iştirakçılarını salamlayıb. İştirakçılara yarışın keçirilmə qaydaları barədə ətraflı məlumat verib. Qeyd edib ki, turnir 2 qrupda 6-14 yaş dərəcələrinə uyğun olaraq A və B qrupları üzrə keçirilir. A qrupu üzrə 54, B qrupu üzrə 80 idmançı şagird olmaqla, ümumilikdə 134 idmançı şagird iştirak edir. A qrupu səhər saat 10:00-da, B qrupu günorta saat 14:00-da başlanır. Yarışın qaliblərinin məktəb rəhbərliyi tərəfindən diplom və medallarla təltif olunacağını diqqətə çatdırıb.

Sonra Şirvan Şəhər İcra Hakimiyyəti başçısının müavini Aynur Fərzəliyeva Ümummilli liderin mənalı ömür yolundan, həyat və fəaliyyətinin mühüm məqamlarından danışıb. Müdrikliyi, uzaqgörənliyi və təkrarsız fəaliyyəti ilə milli gerçəkliyimizdə əbədi yer almış Ulu Öndərin adı Azərbaycanın, türk dünyasının, bütövlükdə dünya siyasətinin tarixinə qızıl hərflərlə yazıldığını qeyd edib. Ulu Öndərin “Mən fəxr edirəm ki, Azərbaycanlıyam” ifadəsinin hər bir azərbaycanlı üçün müqəddəs kəlama çevrildiyini bildirib. Möhtərəm Prezidentimiz cənab İlham Əliyevin diqqət və qayğısı ilə Azərbaycan şahmatçılarının beynəlxalq yarışlarda yeni qələbələr qazandığını qeyd edərək, turnir iştirakçılarına uğurlar arzulayıb.