Şirvanda Vətən müharibəsinin şəhidi Hümbətov Emil Tərlan oğlunun doğum günü qeyd olunub.

Müzəffər Ali Baş Komandan cənab İlham Əliyevin rəhbərliyi ilə ölkəmizin suverenliyi və ərazi bütövlüyü uğrunda Şanlı Ordumuzun qələbə qazandığı 44 günlük Vətən Müharibəsində qəhrəmancasına döyüşərək şəhidlik zirvəsinə ucalan, ölümündən sonra ​ “Vətən uğrunda”, “İgidliyə görə” və “Füzulinin azad edilməsinə görə” medallarına layiq görülən şəhid Hümbətov Emil Tərlan oğlunun doğum günü 30 oktyabr 2022-ci il tarixdə Şirvan şəhərində qeyd olunub.

Şirvan Şəhər İcra Hakimiyyəti başçısının müavinləri məsul əməkdaşları, hüquq-mühafizə orqanlarının rəhbərləri, ictimaiyyət nümayəndələri, Masallı və Şirvan şəhidlərinin ailələri ilə birlikdə Vətən müharibəsinin şəhidi Emil Hümbətovun doğum günü münasibətilə məzarını ziyarət edərək gül-çiçək dəstələri düzüb və xatirəsini ehtiramla yad ediblər.

Şəhər İcra Hakimiyyəti başçısnın müavini Aynur Fərzəliyeva şəhidlərimizin əbədi ehtirama layiq olduğunu bildirərək şəhidin valideynlərinə Vətənimiz üçün ləyaqətli övlad böyütdüklərinə görə təşəkkür edib və Allahdan onlara səbir diləyib. Azərbaycan Ordusunun qüdrətindən, şəhidlərimizin döyüş zamanı göstərdiyi qəhrəmanlıqlardan söz açaraq Müzəffər Ali Baş Komandanın rəhbərliyi ilə rəşadətli ordumuzun, şücaətli oğullarımızın həyatları bahasına torpaqlarımızı işğalçılardan azad etdiyini diqqətə çatdırıb. Şirvanın qeyrətli oğlu şəhid Emil Hümbətovun keçdiyi qısa və mənalı həyat yolundan bəhs edərək, belə qəhrəman oğullarımızla hər bir azərbaycanlının fəxr etdiyini bildirib. Şəhidlərin xatirəsinin hər zaman uca tutulacağını, hörmət və ehtiramla xatırlanacağını söyləyib. Tarixə adını qanıyla yazan qəhrəman şəhidlərin and yerimizə, ziyarət məkanımıza çevrildiklərini bildirib. Onların ömür yolunun gənclərə nümunə olduğunu, gələcək nəsillərin vətənpərvərlik tərbiyəsində əhəmiyyətli rol oynayacağını vurğulayıb. Emilin döyüşlərdə göstərdiyi şücaətin və fədakarlığın ölkə başçısı tərəfindən yüksək qiymətləndirildiyini, ölümündən sonra bir neçə medalla təltif edildiyini diqqətə çatdırıb. Qeyd edib ki, Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən siyasətin əsas istiqamətlərindən birini müharibə veteranlarının, əlillərinin, şəhid ailələrinin sosial müdafiəsinin gücləndirilməsi, onların problemlərinin vaxtında həll edilməsi, hər cür qayğı ilə əhatə olunması təşkil edir. Bu siyasətin davamı olaraq Şirvan şəhərində də şəhid ailələri və qazilərə diqqət və qayğı göstərilməsi yüksək səviyyədə həyata keçirilir.

Sonra çıxış edən Dövlət Təhlükəsizlik Xidmətinin Şirvan şəhər şöbəsinin rəisi Mehman Qasımov, Səfərbərlik və Hərbi Xidmətə Çağırış üzrə Dövlət Xidməti vəzifəsini müvəqqəti icra edən İlkin Məmmədov, şəhər Bəldiyyəsinin sədri Kürdoğlu Muradov, din xadimi Hacı Vasif 44 günlük Vətən müharibəsinin müxtəlif məqamlarından bəhs ediblər. Azərbaycan Ordusunun əsgər və zabitlərinin göstərdikləri qəhrəmanlıq və şücaət nümunələrinin hər bir Azərbaycan vətəndaşında müstəqilliyimizin əbədiliyinə, dövlətimizin sarsılmazlığına, vətənimizin bütövlüyünə əminlik yaratdığını bildiriblər. Şəhid adının müqəddəsliyindən və əzəmətindən bəhs edərək, Emul Hümbətovun qısa, lakin şərəfli həyatı, şanlı döyüş yolu haqqında danışıblar.

Şəhidin atası Tərlan Məmmədov şəhid ailələrinə göstərilən diqqət və qayğıya görə ölkə başçısı cənab İlham Əliyevə və Birinci vitse-prezident, hörmətli Mehriban xanım Əliyevaya minnətdarlığını ifadə edib.

Sonda vətənimizin müstəqilliyi, müdafiəsi, ərazi bütövlüyü uğrunda canından keçən bütün şəhidlərimizin ruhuna dualar oxunub.

Allah bütün şəhidlərimizə rəhmət eləsin!