Şirvanda Zəfər Gününə həsr olunmuş şahmat birinciliyi keçirilib.

26 oktyabr 2022-ci il tarixdə 6, 8, 10, 12, 14 yaşlı yeniyetmələr arasında 8 Noyabr Zəfər gününə həsr olunmuş Təhsil Respublika İdman Mərkəzinin Şirvan şəhər Uşaq Gənclər İdman-Şahmat Məktəbi Publik hüquqi şəxsin açıq birinciliyi keçirilib. Turnirdə Şirvan Şəhər İcra Hakimiyyəti başçısının müavini Aynur Fərzəliyeva, Şirvan-Salyan Regional Təhsil İdarəsinin rəis müavini Rövşən Allahverdiyev, Şirvan Şəhər Gənclər və İdman İdarəsinin rəisi Samit Həsənov, Şirvan, Neftçala,  Hacıqabul, Salyan və Biləsuvar rayonlarının Uşaq Gənclər İdman-Şahmat məktəblərinin direktorları iştirak edib. Ümumilikdə 100-dən çox şagird şahmat idman növü üzrə yarışa qatılıb. Şirvan şəhər Uşaq Gənclər İdman-Şahmat məktəbinin direktoru Ramil Tağıyev yarışı açıq elan etdikdən sonra Azərbaycan Respublikasının Dövlət Himni səsləndirilib. Sonra Ümummilli lider Heydər Əliyevin və vətənimizin müstəqilliyi və ərazi bütövlüyü uğrunda şəhid olanların əziz  xatirəsi bir dəqiqəlik sükutla yad edilib. Şirvan Şəhər İcra Hakimiyyəti başçısının müavini Aynur Fərzəliyeva 44 günlük Vətən müharibəsinin şanlı məqamlarından söz açıb. Müzəffər Ali Baş Komandanın rəhbərliyi ilə rəşadətli Azərbaycan Ordusunun zəfər yürüşündən danışıb. 8 noyabr Zəfər Gününün Ordumuzun gücü, xalqımızın birlik və həmrəyliyinin bariz nümunəsi olduğunu diqqətə çatdırıb.  Gənclərin intellektual bacarıqlarının möhkəmləndirilməsində əhəmiyyətli yeri olan Şahmat yarışlarının keçirilməsinin və bu yarışların Zəfər Gününə həsr olunmasının  əhəmiyyətini vurğulayıb. Ölkəmizin dünyada tanınan kifayət qədər şahmat çempionu olduğunu qeyd edərək, iştirakçılara bu sahədə özlərini inkişaf etdirmələrini tövsiyə edib. Şirvan-Salyan Regional Təhsil İdarəsinin rəis müavini Rövşən Allahverdiyev çıxış edərək gənclərin vətənpərvər, sağlam düşüncəli, dünyagörüşlü, intelektual yetişməsi üçün onların idmanın müxtəlif növləri ilə məşğul olmalarının vacibliyindən danışıb. Zəfər tariximizə  həsr olunmuş yarışların bundan sonra da davam etdriləcəyini vurğulayıb və yarış iştirakçılarına uğurlar arzu edib. Turnirdə yer tutan şahmatçılar yaş qrupları üzrə diplom, medal və hədiyyələrlə təltif olunacaqlar.

Mətbuat xidməti