Təhsil müəssisələrində bayram tədbirləri keçirilib.
Şirvan şəhərinin ümumtəhsil məktəblərində və körpələr evi-uşaq bağçalarında 31 dekabr-Dünya Azərbaycanlılarının Həmrəyliyi Günü və Yeni il bayramı münasibətilə silsilə tədbirlər keçirilib. Ümumtəhsil müəssisələrinin və bağçaların kollektivlərinin, valideynlərin, qonaqların iştirak etdiyi tədbirlərdə məktəblilərin və balacaların ifasında milli birliyə, həmrəyliyə, yeni təqvim ilinin gəlişinə və qışa həsr olunmuş ədəbi-bədii kompazisiyalar, milli və əcnəbi rəqslər, səhnəciklər nümayiş olunub. Uşaqlar Şaxta baba və Qar qızla birgə rəqs edib, mahnılar səsləndiriblər. Şeirlər söyləyərək hər bir fəslin, xüsusilə qış fəslinin gözəlliklərini tərənnüm ediblər. Bir-birindən rəngarəng çıxışları ilə əsl bayram əhval-ruhiyyəsi yaradıblar. Ümumtəhsil məktəblərinin və körpələr evi-uşaq bağçalarının rəhbərləri və müəllimlər uşaqları 31 dekabr-Dünya Azərbaycanlılarının Həmrəyliyi günü və Yeni il bayramı münasibətilə təbrik edərək onlara ən xoş arzularını bildiriblər. Tədbirdə körpə balalara Şaxta baba və Qar qızın bayram hədiyyələri təqdim olunub.
Mətbuat xidməti
