Torpaq və əmlak idarəçiliyi sahəsinə həsr edilmiş növbəti zona müşavirəsi Şirvanda keçirilib.

İqtisadiyyat Nazirliyi yanında Əmlak Məsələləri Dövlət Xidməti və Şirvan Şəhər İcra Hakimiyyətinin birgə təşkilatçılığı ilə fevralın 28-də torpaq və əmlak idarəçiliyi sahəsinə həsr edilmiş zona müşavirəsi keçirilib. Müşavirədə Şirvan şəhəri, Saatlı, Sabirabad, Neftçala, Salyan və Hacıqabul rayonlarının İcra Hakimiyyəti başçıları, yerli icra hakimiyyəti orqanlarının məsul əməkdaşları, bələdiyyələrin və kütləvi informasiya vasitələrinin nümayəndələri iştirak edib. Öncə Azərbaycan xalqının Ümummilli Lideri Heydər Əliyevin şəhərin mərkəzi meydanında ucalan abidəsi ziyarət edilib, xatirəsinə ehtiram əlaməti olaraq abidə önünə gül dəstələri düzülüb. Müşavirəni giriş sözü ilə Şirvan Şəhər İcra Hakimiyyətinin başçısı İlqar Abbasov açaraq, qonaqları salamlayıb və müşavirənin işinə uğurlar arzulayıb. Müşavirədə çıxış edən Əmlak Məsələləri Dövlət Xidmətinin rəis müavini Elçin Yusubov vurğulayıb ki, dövlət başçısı tərəfindən təsdiq edilən inkişaf strategiyalarında müəyyən edilmiş hədəflərə nail olunmasında ölkənin potensial imkanlarının əsas elementi kimi qiymətləndirilən torpaq ehtiyatlarının səmərəli idarəetməsinin təşkili və torpaq münasibətlərinin tənzimlənməsi mexanizmlərinin təkmilləşdirilməsi xüsusi əhəmiyyət kəsb edir. Sonra Torpaqların dövlət idarəetməsinin təşkili və geodeziya şöbəsinin müdiri vəzifəsini icra edən İlqar Həbiyev, Daşınmaz əmlakın dövlət kadastrı və Yerquluruluşu Layihə-Tədqiqat Mərkəzi MMC-nin direktoru vəzifəsini icra edən Ağakişi Alıyev, Torpaqlardan istifadəyə və onların müdafiəsinə dövlət nəzarəti şöbəsinin müdiri vəzifəsini icra edən Taleh Bəşirov, Şirvan Şəhər İcra Hakimiyyətinin Memarlıq və tikinti şöbəsinin müdiri, baş memar Şaiq Şıxəliyev torpaqların və dövlət əmlakının idarə edilməsi, istifadəsi və onların mühafizəsinə nəzarət olunması, dövlət əmlakının və torpaq sahələrinin icarəyə cəlb edilməsi,  bələdiyyə torpaqlarının fiziki və hüquqi şəxslərin mülkiyyətinə və ya icarəsinə verilməsi ilə bağlı rəyvermə işləri, elektron baza xəritələrinin işlənməsi barədə məlumat veriblər. Müşavirədə bildirilib ki, Şirvan, Saatlı, Sabirabad, Neftçala, Salyan və Hacıqabul rayonları üzrə ümumilikdə 776 642 hektardan, hazırda 433 554 hektarda olan ərazilərdə yerləşən bütün torpaqlar və onların üzərindəki daşınmaz əmlaklar barəsində müfəssəl kadastr məlumat bazası yaradılıb. Qalan 343 088 hektar ərazidə işlər davam etdirilir. 2020-2022-ci illərdə regionu əhatə edən rayonlarda Dövlət Xidməti tərəfindən aparılan monitorinqlər, rayon icra hakimiyyətlərindən alınmış məlumatların təhlili göstərir ki, bəzi hallarda kənd təsərrüfatına yararlı torpaq sahələri təyinatı üzrə istifadə olunmur, dövlət və bələdiyyə mülkiyyətində olan hüquqi və fiziki şəxslərə icarəyə verilmiş torpaqların sənədləşdirilməsində və istifadəçiliyində torpaq qanunvericiliyinin tələbləri pozulur. Aparılmış monitorinqlər nəticəsində 2020-2022-ci illər ərzində adıçəkilən rayonlarda Əmlak Məsələləri Dövlət Xidməti tərəfindən torpaq qanunvericiliyinin pozulması ilə bağlı 525 hal aşkar edilərək sənədləşdirilib. Bu dövrdə rayonlarda torpaq qanunvericiliyi sahəsində yol verdikləri pozuntu hallarına dair müvafiq torpaq istifadəçiləri ilə bağlı 487 inzibati protokol tərtib edilib, 210 min manat məbləğində cərimə tətbiq olub. Həmin hallarla bağlı qanunvericiliklə müəyyən edilmiş tədbirlərin görülməsi məqsədilə aidiyyəti üzrə yerli icra hakimiyyətlərinə, müvafiq icra hakimiyyətləri orqanlarına müraciətlər edilib. Torpaq qanunvericiliyinin pozulması hallarının qarşısının alınması və aradan qaldırılması istiqamətində aidiyyəti dövlət orqanları ilə birgə fəaliyyətin gücləndirilməsinin, təsirli tədbirlərin görülməsinin vacibliyi diqqətə çatdırılıb. Həmçinin, torpaqlardan istifadə edilməsi və onların mühafizəsi sahəsində qanunvericiliyə əməl olunması ilə bağlı preventiv tədbirlərin, davamlı maarifləndirmə və izahat işlərinin aparılması, bu məsələlərdə ictimaiyyətin, kütləvi informasiya vasitələrinin və bələdiyyələrin iştirakının gücləndirilməsi vacibdir. Sonda müşavirədə qeyd olunanlarla bağlı fikir mübadiləsi aparılıb, təkliflər dinlənilib, əməkdaşlıq istiqamətləri müzakirə olunub. Müşavirədən sonra qonaqlar Şirvan şəhər Şəhidlər Xiyabanını ziyarət edib, Vətənimizin müstəqilliyi və ərazi bütövlüyü uğrunda həlak olan şəhidlərimizin ruhlarına dualar oxuyublar. Həmçinin Vətən müharibəsindən sonra Şəhidlər Xiyabanında aparılan abadlıq-bərpa işləri ilə tanış olublar.

Mətbuat xidməti