Vaqif Gözəlovun xatirəsinə həsr olunmuş yeniyetmələr arasında boks idman növü üzrə xatirə turniri keçirilib.

13 aprel 2023-cü il tarixdə Şirvan Şəhər İcra Hakimiyyətinin və Şirvan Şəhər Gənclər və İdman İdarəsinin birgə təşkilatçılığı ilə Şirvan Olimpiya İdman Kompleksinin boks zalında Azərbaycan Respublikasının "Əməkdar Bədən Tərbiyəsi və İdman Xadimi" , "Tərəqqi" medallı, SSRİ idman ustası, beynəlxalq dərəcəli hakim, Şirvan boksunun təməlini qoyan Gözəlov Vaqif Yusif oğlunun xatirəsinə həsr olunmuş yeniyetmələr arasında boks idman növü üzrə xatirə turniri keçirilib. Yarışdan öncə Vaqif Gözəlovun məzarı ziyarət olunaraq, tər qərənfillər düzülüb, ruhuna dualar oxunub. Yarış Azərbaycan Respublikasının Dövlət Himni səslənməsi ilə açılıb. Sonra Vaqif Gözəlovun əziz xatirəsi bir dəqiqəlik sükutla yad olunub. Yarışın açılış mərasimində çıxış edən Şirvan Şəhər Gənclər və İdman İdarəsinin rəisi Samit Həsənov qonaqları salamlayaraq Vaqif Gözəlovun ömür yolunun gənc idmançılarımız üçün məktəb olduğunu və bu məktəbin yetirmələrinin respublikamızın idman şərəfinin qorunması yolunda uğurla addımladıqlarını diqqətə çatdırıb. Onun yetirmələrinin respublika və dünya çempionatlarında yer tutduğunu və mükafatlara layiq görüldüyünü vurğulayıb. Zəhmət və mübarizə ilə keçən ömrünü faydalı işlərə sərf etdiyi üçün şəhərimizin idman tarixində onun adının əbədi yaşayacağını bildirib. Digər çıxış edənlər də Vaqif Gözəlovla bağlı xatirələrini bölüşüblər. Çıxışlardan sonra yarışlara start verilib. Sonda qaliblər Gənclər və İdman İdarəsi tərəfindən diplom və medallarla təltif olunublar.

Mətbuat xidməti